Shillong, Naitung 17: Na ki 60 ngut ki MLA hapoh ka iing dorbar thawain ka jylla kiba la poi ban thep vote ban jied president mynta ka sngi kila long tang 52 ngut, phra ngut kiwei pat kim shym la poi sha kane ka jingjied president, la ong u Bah F R Kharkongor returning officer na ka bynta kane ka election president.
U Dr Mukul myntri rangbah ka jylla u la iathuh ba ar ngut ki MLA na ka liang synshar kin nym lah ban poi sha kane ka jingjied president bad kita ki long u myntri PWD u Martin M Danggo bad u Bah Justin Dkhar u ba don mynta sha Bangalore.
Na ka liang jong ka UDP, u khlem poi sha kane ka jingjied president dei u MLA jong ka Mawthadraishan u Bah Brolding Nongsiej namar ba um don hapoh ka jylla Meghalaya, kane ka long katkum ka jingiathuh jong u Dr Donkupar Roy president jong ka UDP.
Katba u MLA shimet jong ka Mawhati u Bah Julius kitbok Dorphang um shym la wan thep vote namar ba u don ha phatok, hynrei kam shym don ka jingkhang ia u ba un nym wan thep vote namar kum u MLA ba la jied da ki paidbah u dang don ia ka hok ban thep vote hynrei ym shym la poi.
Katba na ka ki saw ngut ki MLA jong ka seng HSPDP kim shym la poi thep vote namar ba kila dep shim ia ka rai ba kin nym ia shim bynta ha kane ka president election. Kine ki saw ngut ki MLA jong ka HSPDP ki long u Bah Ardent M Basaiawmoit, Bah Phlastingwell Pangniang, Bah D Jyndiang bad u Bah Witting Mawsor.
