Shillong, Nohprah 14: U myntri rangbah ka jylla u Dr Mukul Sangma haba jubab ia ka jingkylli kaba la wabrah da u Bah Witting Mawsor bad u Bah Paul Lyngdoh ha kaba ia dei bad u Aadhaar, na ka liang jong u myntri rangbah u la ong ba ka sorkar kam pat pyntrei kam ia u Aadhaar bad kam pat long kaba don kam.
U Dr Mukul u la ong ba “ Na ka bynta jong nga shimet ngam nym pynrung kyrteng hapoh Aadhaar”. U myntri rangbah u la ong ba ka sorkar jylla kala shim khia ia kane ka kam ban ia kren bad ka sorkar pdeng bad dei ha dien ka jingiakren ba ka tnad kam poh iing jong ka sorkar pdeng kala phah ia ka shithi ha ka 5th September 2017 bad ha kane ka shithi la ong ba hapoh ka jylla Meghalaya ia u Aadhaar kam pat long kaba don kam haduh katta.
U Dr Mukul u la ong ba ka long kaba ym lah ban sngewthuh ha kawei ka liang ka sorkar pdeng ka ong bay m don kam Aadhaar, ha kawei ka long pat ka long don kam Aaadhar, kane ka jingklumar jingmut kam dei tang ha jylla Meghalaya hynrei ha baroh kawei jong ka Ri India, kane ka dei ka jingeh kaba ki paidbah jong ka Ri India ki ia kynduh.
U myntri rangbah u la pynshai hapoh ka iing dorbar mynta ka sngi ba na ka bynta ki skhim kiba pyntrei kam da ka sorkar jylla, yn nym don kam Aadhaar, hynrei ha kaba ia dei bad ki skhim jong ka sorkar pdeng hap ban don Aadhaar, u myntri rangbah u la ong ba kum ka baibam jong ki khynnah skul kane kam dei ka skhim jong ka sorkar jylla ka dei ka skhim jong ka sorkar pdeng don kam ia u Aadhaar.
Haba jubab ia ka jingkylli balei ka sorkar kam pynsngeh syndon ia kane, u myntri rangbah u la ong ba lada pyntrei kam ruh ka don ha ka jingeh bad lada khlem pyntrei kam ruh ka don ha ka jingeh namar bun buh ki khynnah pule kiba pule sha bar ka jylla bad ha ka juh ka por kiba trei sha bar ka jylla bad kiba la ioh penshon na ki kam sorkar ki don kam ia u Aadhaar namar ka ia dei bad ki kam pisa.
U Myntri rangbah u la ong “ Wat ma nga ruh nga klumar ha kaba ia dei bad u Aadhaar” kaba shai ka long ba ka sorkar kam shym pynbor iano iano ruh ba kin pynrung kyrteng ha u Aadhaar, ka shong ha ka mon laitluid jong u ne ka briew ban pynrung kyrteng Aadhaar. La iathuh hapoh ka iing dorbar ba haduh mynta kiba la dep ban pynrung kyrteng Aaadhar ha ka jylla Meghalaya ki long 6,29,600 ngut baroh.
