Na ka jingialang paidbah u bah Ardent ha Madan Student mih ka kynhun “ Iada La Kari”

Shillong, Rymphang 06: Mynta ka sngi palat hajar ki briew kila ia poi ban ia shim bynta sha ka jingialang paidbah kaba la khot da u Bah Ardent Basaiawmoit ha Madan Student ryngkat ki nongkyrshan jong u bad na ka jingialang paidbah la mih ka kynhun “Iada La Kari”.

Ha dien ka jingpynshai paidbah ia kane ka jingthmu ha kaba khot ia kane ka jingialang paidbah, la shim ia ka rai ban thaw ia katei ka kynhun ha kaba u bah Ardent un long u nongialam.

Ban pyntyllun ia ka kam sha khmat, u bah Ardent u la ong ba ka kam kaba ha khmat jong kane ka kynhun ka long ban lum ban long shuwa ia ki nongialam shnong, ban lum ban lang ia ki seng bhalang ha kawei ka lama “Iada La Kari” bad ban leit sha Delhi da katei ka Lama.

Ha ka jingkren u bah Ardent u la kyntu ia ki paidbah ba dei ban buh ia ka jaidbynriew sha khmat bad ia ka Niam sha dien, u la ong ba bun sien namar ka niam klet noh ia u pradoh para snam. La ong shuh shuh ba ki don ki briew kiba na sha bar kiba pyrshang ban pharia ia ka jaidbynriew.

Ha kane ka jingialang la shim ruh ia ka rai ba ka ktien phira jong kane ka kynhun kaba thymmai kan long “Ka Lawei Ka Jaidbynriew”. U la ong ba kane kan dei na ka bynta ka lawei jong u long dien man dien.

Ha kane ka jingialang u la ong ba kane ka dei ka sngi jong ka jingjop shuwa ban sdang ia kane ka jingiakhih. U la ong ba dei ban ieng ban iada la ka ri ha kaba u wei pa u wei u don ka bynta ban iada ia ka jaidbynriew na ka bynta ka pateng ki long dien man dien.

Ha kane ka jingialang paidbah u Bah Ardent u la ong ba u sngew ba kane ka sorkar ka pyrshang ban ialam bakla ia ki paidbah ha kaba ia dei bad ka Inner Line Permit bad ia ka Citizenship Amendment Act.

Kumba ka long mynta ka jaidbynriew kala sdang hiar bad sdang ka jingduh jingkyrmen, ka daw baroh ka dei namar la bakla na sdang haba ioh ia la ka jylla kaba khlem pud khlem sam kaba dang hap ban ia khih haduh mynta.

La ong ba dei ha ka sngi ba ioh ia ka jylla bala pynrung ia ka Para 12(A) hapoh ka khyrngit kaba hynriew jong ka Riti Synshar jong ka Ri. La ong ba haduh mynta kam don kano kano ka ain kaban iada ia ka jylla.

Ha jingialang paidbah u bah Ardent u la ong ba ki Naga, ki Mizo kila ioh ia ka Artikle 371, kaba la ia da ia ki kaba ong ba kan nym don kino kino ki ain jong ka parliament ban trei kam ha kitei ki jylla. U la ong ki District Council kin nym lah ban thaw ain ban iada ia ka jylla.

Haba phai sha ka MRSS Act, u la ong ba ha katei ka por ba long MLA u la long u dkhot ha ka Kommittee shuwa ban pynlong ain ia ka na ka liang jong u kum u MLA u la pyrshah ia katei ka ain, ha kaba u Dr Mukul kum u myntri rangbah u la ong bay m don shuh ban ia kren ia ka ILP, ka paw shai ba ka party jong u kam pdiang ia ka ILP.

Haba phai sha ki dorbar shnong, u la ong ba ki dorbar shnong kim don ia ka ain, lada don kam ain ban pyntrei kam ia ka ILP kan long kaba khlain. U la kynnoh ba ka sorkar kam shym la shimkhia halor ka ILP.

U bah Ardent u la kynnoh ba ka don ka jingiasngewthuh jingmut ha pdeng u Conrad K Sangma bad u Amit Shah myntri kam poh iing ka sorkar tang ban pynsngap jar ia ka jingiakhih ki paidbah ba dawa ILP.

La ong ba kum u hynmen rangbah un lum un lang ia baroh ki seng bhalang, ia ki nongialam shnong ban leit sha Delhi ban dawa na ka sorkar pdeng ban pynioh ia ka ain ba khlain ban iada ia ka jaidbynriew.

 

 

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet