Shillong, Naiwieng 05: Ka jingialang ka Kabinet kaba la long mynta ka sngi kala shim ia ka rai ban pynhiar ia ka dor jong ka Value Added Tax na ka sorkar jylla da T.5.20 tyngka shilitter ia ka Petrol bad ka Diesel bad kane kan trei kam naduh ka por 12.00 baje shiteng synia shibit.
Haba kren ha ki lat pathai khubor u bah Prestone u la ong ba ka jingpynhiar ia ka VAT ka long na ka 20% sha ka 13% ia ka petrol bad ia ka Diesel na ka 12% sha ka 5% bad kane ka pynlong ba ka jylla Meghalaya kan long ka jylla kaba duna eh ka dor ha India.
La ong ba ka dor jong ka Petrol haba shim ia ka khajna kaba la pynhiar da ka sorkar jylla bad ka sorkar Pdeng ka Petrol kan hiar da T.10.20 tyngka ha ka shilitter bad ia ka Diesel pat kan hiar dor da T.11.08 tyngka ha baroh kawei ka jylla.
Da kane ka jingpynhiar dor ia ka khajna jong ka Petrol bad Diesel ka jylla kan duh nongda T.100 klur tyngka ha ki san bnai ban sa wan kata haduh ka dorbar mang tyngka. Haba ia nujor ka dor jong ka Petrol bad Diesel ha Guwahati bad Shillong ka kham ta ha Shillong.
U Symbut Myntri rangbah ka jylla u la ong ba ka jingbym don ia ka jaka buh ia ka Petrol bad Diesel ha la ka jong ka jylla kala long ruh kawei na kidaw jong ka jingkiew ka dor umphniang bad iarap ia kane ka sorkar kan ialeh ban buh noh da ka Depo ha Meghalaya bad la aiti sha ka tnad sam bam ba kan wat jaka ha Ri Bhoi.
