Shillong, Nailar 19: Ka sorkar Meghalaya kala don ka jingpynkhreh ba na ka skhim MGNREGA ia kaba la tip paidbah kum ka skhim bylla shipah sngi, mynta kan shna ia ki pung ri dohkha ha u ne u snem mang tyngka 2018-2019.
Ki lad khubor ki iathuh ba ia kane yn leh da kaba ia khlehlang ia ka skhim MGNREGA ka skhim na ka tnad ri dohkha jong ka sorkar jylla bad Basin Development ban shna ia ki pung ri dohkha bad ia kane ka jingthmu yn pyntrei kam ha u ne u snem mang tyngka 2018-2019.
Ha ka jingshisha ka skhim MGNREGA ka dei ka skhim jong ka sorkar pdeng ia kaba la ia tip paidbah kum ka skhim bylla shispah sngi bad kane ka skhim ka long ban shna ia ki jingtei sha ki nongkyndong ba kin kylla long ki jingtei ban pynmyntoi ia ki paidbah jong ka shnong ka thaw baroh kawei.
Wat la ia kane ka jingiakhlehlang ia ki skhim jong ka sorkar pdeng ka MGNREGA, ka skhim ri dokhah na ka sorkar jylla bad ka Basin Development kaba dei kawei na ki shnat trei kam ia kaba la seng da ka sorkar jylla haduh mynta kam pat don ka jingshai kaba thikna la kine pung dohkha kin dei jong ka shnong ne kan leit sha ki kynhun.
