Shillong, Nailar 30: Ha dien bala wan phai na Nongbah Delhi, u myntri ka sorkar jylla u Bah Lahkmen Rymbui u la iathuh ba na ka T.163.31 klur kaba la ioh na ka sorkar pdeng ka dei ka kumno kaba la lum na ka jingshah pynjop jong ki khlaw ha kane ka jylla da ki karkhana bad ka jingshna ia ki surok bah, u la pan 10 % na katei ka pisa ban pyndon kam ban sumar ia ki khlaw paidbah.
Haba kren ha ki lad pathai khubor mynta ka sngi ha ophis trei kam, u myntri kam khlaw jong ka jylla u la ong ba ha Meghalaya ka sorkar ka don ki khlaw tang 5% bad ki riew shimet ne ki jong ki shnong ki raid ki long haduh 76%. Haba ia dei bad kane u la ai da ka jingthoh sha ka sorkar pdeng ban shah ia ka jylla Meghalaya bas 10% yn pyndonkam ha kaba pynbha ia ki khlaw jong ki riew shimet.
Haba pan ia kane ka 10%, u myntri u la ong ba ha kane ka jylla ki dang don ki khlaw shnong, jong ki hima ha kaba ka sorkar kam shim wai ia ki na ka bynta ban pynneh pynsah ia ki khlaw khamtam eh ia ki tyllong um. Haba ia dei bad kane ka jingpang na ka liang jong ka sorkar jylla ka dang ap ia ka jubab na ka sorkar pdeng.
U myntri u la iathuh ba ia kane ka pisa T.163.31 klur kaba la lum na ki karkhana, na ka jingshna ia ki surok ha kine ki shiphew snem kiba dei na kane ka jylla Meghalaya, ban pyndon kam ia kane ka pisa ka sorkar ha ka 20th Lber 2019 mynta u snem kala thaw ia ki lai tylli ki kommittee katkum ka jingbethah jong ka sorkar pdeng.
Kine ki lai tylli ki kommittee ki long, ka Governing Body ha kaba la khlieh da u myntri rangbah ka jylla, ka Steering Kommittee kaba la khleih da u Chief Secretary bad ka Executive Committee kaba la khlieh da u PCCF jong ka tnad khlaw ka sorkar jylla na ka bynta ban pyndon kam ia katei ka pisa ha kaba thungdieng biang ha ki jaka shrah.
La iathuh ba la buh kyndon ba ka sorkar jylla kam lah ban pyndon kam ia kane ka pisa kum ka jingthied kali, ban leit sha bar Ri bad ban siew ia ka bai nongtrei kine ki long ki kyndon kiba la buh ba ka sorkar kam lah ban pyndon kam ia kane ka pisa, la ong u myntri ba dei peit ia ka tnad khlaw.
