Shillong, Lber 06: Ka Deputy Commissioner jong ka East Khasi Hills District ka kong Matsiewdor War Nongbri mynta ka sngi kala pynbam smai ia baroh 29 ngut ki MDC jong ka Khasi Hills Autonomous District Council (KHADC) hapoh iing dorbar jong ka KHADC mynta ka ka sngi ba kin long ki MDC ba pura jong ka Council.
Ha kane ka jingbam samai na ki 29 ngut ki MDC, tang ar ngut ki MDC kiba la bam smai ha ka ktien khasi, u bah Pyniaidsing Syiem bad u bah Teiborlang Pathaw, katba kiwei 27 ngut kila bam samai ha ka katien phareng.
Ia ka jingpynbam smai la sdang katkum ki numbor jong ki konstitwensi, la sdang na u Bah Victor Ranee na ka 1-Jirang konstitwensi kaba nyngkong ha ka KHADC bad la pynkut ha u Bah Gigur Myrthong jong ka 29-Mawshynrut konstitwensi. Ha kane ka sngi pynsmai baroh 29 ngut ki MDC kiba la jop ia ka ilekshon MDC kila poi lut sha iing dorbar.
Ha kane ka sngi ka ophis jong ka KHADC kala shlei da ki paidbah khamtam na ka liang jong kiba ha iing ha sem kiba la jop ia kane ka ilekshon bad ki nongkyrshan jong ki MDC. Ban lait na ka jingkhap ngiah ka ophis jong ka Legislative kala shah tang 10 ngut ki briew na u wei u MDC ban ioh rung sha ka jaka ba pynsmai ia ki MDC.
