Shillong, Nohprah 08: Na ki lai tylli ki “Regional Kommittee” kiba ka sorkar Meghalaya kala thaw ban peit bniah ia ka jingiakren kam pud bad ka jylla Assam, ar tylli kila ai ia ka kaiphot jong ki sha u myntri rangbah ka jylla u Cornad Mynta ka sngi.
Mynta ka sngi ka Regional Kommittee jong ka West Khasi Hills District hapoh ka jingialam jong u bah Renikton L Tongkhar myntri ka sorkar jylla,ha ka jingdon lang u bah Broling Nongsiej myntri, bah Gigur Myrthong bad bah Macmillan Byrsat kila aiti ia ka kaiphot ha u myntri Rangbah ka jylla u Cornad K Sangma.
Ha kane ka sngi ka Regional Kommittee, ba dei peit ia ka Ri Bhoi District hapoh ka jingialam jong u Symbut Myntri Rangbah ka jylla u bah Prestone Tynsong mynta ka sngi kila ai ia ka kaiphot sha u myntri rangbah ka jylla u Cornad K Sangma ha kaba ia dei bad ka Ri Bhoi District.
Ha kane ka jingleit ban aiti ia ka kaiphot sha u myntri rangbah ka jylla, nalor u Symbut Myntri Rangbah u bah Prestone Tynsong, la don lang ruh u bah Dasakhiatbha Lamare myntri ka sorkar jylla, la don lang ka Deputy Commissioner ka Ri Bhoi kong R M Kurbah bad ar ngut ki ophisar.
Katba ka Regional Kommittee kaba dei ia ka Jaintia Hills kam pat ai ia ka kaiphot sha u myntri rangbah ka jylla. Ka jingthaw jong ka sorkar jylla ia kine ki lai tylli ki Regional Committee ka long ba kin peit bniah ha kaba ia dei bad jingiakajia pud hapdeng ka Assam bad Meghalaya.
