Shillong Jymmang 27: Ki paidbah na kylleng ki jaka kynthup naduh ki samla ki rangbah bad ki tymmen, mynta ka sngi ki la wan tuid sha ka jaka shah thngan jong u bah Ardent ban ai jingkyrshan ia ka jingiakhih jong u haba iadei bad ka Reservation Policy.
Watla ka jingshong shah thngan jong u nongialam ka Voice of the people party u bah Ardent Miller Basaiawmoit ka la iaid sha ka san sngi kynthih ka sorkar jylla haduh mynta ka dang leh bym suidniew halor ia ka jingdawa ka VPP.
Na ka liang une u nongialam ruh u la pyneh beit triang ba un nym khih na kane ka jaka shah thngan, Katba ka sorkar kam ai pat ai ia ka jubab haba iadei bad ban pynbeit ia ka bhah thungkam thungjam ka Reservation Policy.
Lah ban kdew ba kane ka jingiakhih u bah Ardent kala sdang naduh ka 23 Tarik Jymmang ha khmat ka Additional Secretariat, na ka liang jong ki doktor ruh ki leit ban peit ia ka jingkoit jingkhiah jong u nongialam ka party.
