Shillong, Risaw 6: U Symbut myntri rangbah ka jylla u bah Prestone Tynsong mynta ka sngi u la pyntip ba ka jinglut baroh ha kane ka jingiakhun pyrshah ia kane ka khlam COVID-19 naduh u bnai Lber haduh ba kut u Nailur 2020 ka jinglut baroh kala kot sha ka T.399 klur tyngka bad kane ka jinglut ka long na ki head bapher bapher.
Na ka National Health Mission (HNM) ka jinglut kala kot sha ka T.188.9 klur bad na kane ka sorkar kala dep ban siew T.97.7 klur bad kaba dangsah kaba dang hap ban siew ka long T.91.2 klur.
Na ka tnad Director Health services, la pynlut ia ka pisa ha kaba thied ia ki Ventilators, ki mashin, Oxygen bad kiwei kiwei ki jingthied ka long T.82.4 klur bad na kane la dep ban siew 42.4 klur bad kaba dang sah hap ban siew ka long T.40 klur.
Na ka Chief Minister Special Grant la pynlut ka sorkar ha kaba wan ialam ia ki briew kiba la sah kut sha bar jong ka jylla bad ka jingai ia ki marbam ka jinglut baroh ka long T.14.7 klur bad na kane la dep ban siew T.6.4 klur bad kaba sdang sah ka long T.8. 3 klur.
Ka jinglut na ka Chief Minister relief Found, ha kaba thied ia ki Ambulance, Biomedical, ha ki Community quarantine centre ka long T.7.4 klur ia kane la dep ban siew lut.
Na ka Special Rural Work Programmes, la ai sha ki MLA baroh 60 ngut mar T.25 tyngka ba kin peit ha ki konstitwensi jong ki bad baroh kala kot sha ka T.15 klur ia kane ka pisa la dep ban siew dep.
Ka sorkar jylla kala ioh na ka PM Care T.3.5 klur tyngka kane ka long ban pynlut na ka bynta kito ki nongbylla bad ia ka jinglut na ka bynta kane la dep ban siew dep baroh ha kaba ia dei bad ka pisa kaba wan na ka ophis u myntri rangbah duh jong ka Ri India.
Na ka District Minerals Fund, ia kane ka pisa la pynlut ha kaba buh ia ka jaka sah ba shipor jong ki briew bad ka jinglut baroh ka long T.8.9 klur bad ia kane la dep ban siew lut baroh.
Na ka State Disaster Relief Found, la pynlut T.23.7 klur kane ka long ban shna ia ki jaka test, ki laboratory bad ban peit iaki containment zone, ia kane ka pisa la dep ban siew baroh.
Na ka urban affair, la pynlut T.3.5 klur kane ka long ban thied ia ki tiar ban synreit dawai ia ki jaka paidbah ha kylleng ka ki jaka sor ha ka jylla bad ia kane ka pisa la dep ban siew lut.
U Symbut myntri rangbah u la ong ba na ka T.399 klur ka jinglut baroh ka sorkar kala dep ban siew haduh mynta ka long T.251 klur bad kaba sah ka long T.148 klur. Haba ia dei bad kane ka jingiakhun pyrshah ia kane ka khlam COVID-19 ka sorkar pdeng kala bei pisa T.48 klur.
Haba ia dei bad kane ka jingkhein jingdiah baroh kin sa paw ha ka kaiphot jong u Controller Auditor General kaba juh ai jingkhien man la u snem, kumba ka long ka jinglong jingman ha ka liang ka pisa ka jylla ka don ha ka jingduna, na ka liang jong u myntri rangbah ka jylla bad u kin sa leit biang sha Delhi ban ia kren halor kane bad ka sorkar pdeng.
