Shillong, August 20: Ha ka jingiashong jingialang mynta ka sngi hapoh ka jingpyniaid jong u myntri rangbah ka jylla u Conrad K Sangma ka sorkar kala shim ia ka rai ka sorkar ba naduh la shai ka sngi kiba wan phai kin hap ban leh ia ka Quarantine shiphew sngi kane ka long kat kum ka jingbthah jong ka ICMR ia baroh ki jylla ha ka Ri India.
Haba kren ha ki lat pathai khubor u Symbut Myntri Rangbah ka jylla u bah Prestone Tynsong u la ong ba kito kiba wan phai sha ka jylla lyngba ki jaka rung kiba ka sorkar kala buh la ong ba mar ia rung ki hap ban leh ia ka Antigen Test ha ki jaka rung.
Lada ha kane ka Antigen test ki long Negative la shah ia ki ba kin leit sha la ki jong ki iing ki sem hynrei ki hap ban leh ia ka jingshong pynkyrpang ia lade na ka bynta 10 sngi bad ha kane ka por kim dei ban ia khleh bad no bad no, hynrei lada ka test ka long positive yn rah ia ki sha ki Corona Care centre ban peit bniah shuh shuh ia ki da ka tnad ka koit ka khiah.
La iathuh ba ha kane ka jingialang ka sorkar kala shim ia ka rai ban naduh ka 01st Nailur 2020 haduh 07th Nailur 2020 yn khang ia ki jaka rung jaka mih ha ka jylla bad kane kan long na ka bynta lai bnai kata man ka taiew ba nyngkong jong u bnai Nailur, Risaw bad Naiwieng yn khang hynniew sngi lynter ia ki jaka rung jaka mih ha ka jylla.
La iathuh ba ka jingshim jong ka sorkar ia kane ka rai ka long ban pynstieng ia ka jingtrei kam jong ki nongtrei kiba don ha ki jaka rung jaka mih bad ha kane ka por ki don kam ban leit ban ia shim bynta ha ki jinghikai bad ba kin ioh shong thiat.
Na kyntu ia baroh kito kiba kwah ban wan phai sha ka jylla ba kin sngewbha ban tip ba kim dei ban wan sha ka jylla naduh ka shi tarik haduh hynniew tarik jong man u bnai ba kim dei ban wan sha ka jylla kito kiba kwah ban wan phai ki dei ban sngewthuh ia kane ka rai jong ka sorkar.
