Shillong, Nailar 13: Namar kane ka jingjur jong u slap kaba la new mynta lai sngi lynter kala pynlong ia ka khyndew ba kan jem bad kala wanrah ia ka jingtwa khyndew ha kiba bun ki jaka ym tang ha kane ka nongbah Shillong, Hynrei ha kylleng ka Jylla.
Mynta ka sngi ha kapor mynstep ka kynroh jong ka surok kaba mih na Police Bazar ban leit sha Polo ia kaba dang shu dep plie dang shen da u myntri rangbah ka jylla u Dr Mukul Sangma mynta ka sngi kala twa bad kala wanrah ia ka jingsah kut kali ha kane ka jaka.
Ha kine ki sngi ka kynroh jong ka Shillong College ruh kala twa na ka daw jong ka jingjur jong u slap, kane ka jingtwa khyndew kala jia ha kylleng, Haduh ba thoh ia kane ka khubor kam shym la don kano kano ka jingjia ba sngewsih.
Sha Garo Hills namar ka jingjur jong u slap kiwah kila shlei bad bun bah ki briew kila hap ban kynriah na la ki jong ki iing ki sem kaba ki sah. Kum kane ka jingdap jong ka wah ka la jia ruh haka wan kynshi ha kaba ki briew kila hap ban kynriah iing.
