Shillong, Jylliew 09: U Conrad K Sangma la ong ba u dei u Myntri Rangbah ka sorkar synrop lang jong ka Meghalaya Democratic Alliance (MDA) kum u khlieh jong ka sorkar u hap ban shim ia ka jingkitkhlieh da don kano kano ka jingkynnoh.
Haba kren ha ki lat pathai khubor mynta ka sngi la ong ba kum myntri rangbah ka jylla ba ialam ia ka sorkar synroplang kaba kynthup ia ki hynriew tylli ki party bad kum juh ki MLA shimet bad ia kaei kaba jai u hap ban shim ia ka jingkitkhlieh.
U la ong ba ha kane ka jingiatreilang kam shym don kano kano ka jingeh ban pyniaid ia ka sorkar, kaei kaba ki don ki jingkynthoh hangne hangtai dei ka jingkren na ki kum ki riew shimet bad kane ka juh jia ha ka synshar paidbah.
Haba ia dei bad ka BJP u myntri rangbah la ong ba ka don ka jingiajan hapdeng ka sorkar bad ki nongialam ka BJP ha Delhi bad ki ki kam ki iaid, ka jingiakynthoh kaba mih dei tang ha pdeng ki nongialam ha la jylla ia kata kam don kano kano ka jingsngewpher.
Haba ia dei bad ka jingphet noh ka kompeni SS Infrazone Private Limited, kaba shna ia ka surok 4-Lane na Anjalee Petrol Pump sha Sawdew Pomlum la ong ba ia ka jingtip kaba bniah halor dei ka NHIDCL.
Katkum ka jingtip kaba ka sorkar ka don na ka liang jong ka NHIDCL kala khot tender biang ia kane ka jingtrei, kane ka jingphet noh katei ka kompeni ka sorkar ka don ka jingsngewkhia, haba kylli ia ki daw u myntri rangbah la ong ba ka NHIDCL ka tip bha namar ka hap hapoh ka jingpeit ka jong ka.
