Nga kyrmen skhem ka jingkhang tih dewiong kan lait, hynrei ym kumba mynshuwa: Conrad

Mr ConradShillong, Iaiong 17: U myntri rangbah ka jylla u Conrad K Sangma mynta ka sngi u la ai jingkren hapoh ka iing dorbar halor ka jingleit ia kynduh ka jong u ia u myntri jong ka sorkar pdeng u  Piyush Goyal ha kaba kila ia kren na ka bynta ban pynlait noh ia kane ka jingkhang tih dewiong ha ka jylla Meghalaya.

Haba kren hapoh ka iing dorbar mynta ka sngi ban pynshai ia kaei kaba ka sorkar kala leh na ka liang jong u myntri rangbah u la ong ba “nga kyrmen skhem ka jingkhang tih dewiong kan lait, hynrei kan nym long shuh kumba long mynshuwa” la ong u Conrad.

La iathuh ba ha ka jingaikren bad u myntri ka sorkar pdeng kaba la neh shi kynta, ka jingiakren ka long ha ki ar tylli kip hang, kawei ka long ban nym pynjot pathar ia ka mariang bad kawei pat ba ki nongtrei tih dewiong kin ioh ia ka jingiada kaba biang.

Naka liang jong u myntri rangbah u la kren shai ban iada pura ia ka jingduh ka mariang yn nym lah hynrei lah ban pynduna ia ka jingduh ka mariang. U la ong ba kane ka sorkar kala shim khia ia kane ka kam bad kan dang iaid beteng ban wad ki lad ki lynti kumno ban weng ia kane ka jingeh.

Ha ka juh ka por u la kren shai lypa ba ynda la lah ban pynlait ia kane ka jingkhang tih dewiong, kin don ki kyndon kiba pyrkhing ia kaba baroh hap ban ia bud, la da dei ki politician, ki ophisar wat ki nongtrei tih dewiong ka sorkar ia kane ka pynpyrkhing bha ban peit ba yn nym don kiba pynkhein.

Na liang jong u ia kane ka kam la ia kren ruh bad ka ophis jong u myntri rangbah duh jong ka Ri India. U la ong ba ki ophisar jong ka sorkar jylla bad ki ophisar jong ka sorkar pdeng ki dang beteng ia kane kane ka jingiakren ha Delhi mynta.

U myntri rangbah u la ong ba ha kine ki saw snem jong ka jingkhang tih dewiong kala ktah ia ka ioh ka kot jong ka jylla, ym tang ia ka sorkar hynrei wad ki paidbah ruh kum juh. Ka sorkar kaba juh ioh ia ka bai musur T.700 klur tyngka man u snem na u dewiong kala duh mynta.

Lada khein kyllum ia ka jingsah kut jong ka pisa na kane ka jingkhang tih dewiong ka long kumba T.4000 klur tyngka bad haba ka pisa ka sah kut ka iew ka hat ka poi ha ka khim khait bad kala ktah shibun ia ki nongbylla.

Kane ka jingkhang tih dewiong kam dei ba ka ktah tang ia ki paidbah jong ka jylla Meghalaya, hynrei kala ktah ruh ia kiba bun bah ki karkhana kiba pyndon kam ia u dewiong, kum ki karkhana pynmih kat sada ha Assam, ki karkhana pynmih dewbilat bad kumta ter ter.

U myntri rangbah  u la kren ba kane ka jingleit ia kynduh ka jong u ia ka sorkar pdeng halor kane ka kam khangtih dewiong da ka NGT ha kane ka jylla ka long halor ka rai ba ka iing dorbar kala pdiang ha ka 24th Nailur 2015. Kane ka sorkar kan shim khia ban peit ba kane ka jingkhang tih dewiong kan lait tang ba halor jong ki kyndon.

What Next?

Recent Articles

Leave a Reply

Submit Comment
*