Shillong, Risaw 13: U Headmaster jong ka skul Mit Changdong Nongsyllei Secondary School u bah Fairson Kharjana u la kyntu ia ka tnad pule puthi jong ka sorkar jylla ba kan ailad ia ki khynnah ba kin thoh ia ka eksamin phainal SSLC ha u snem 2022.
Ban pynksan ia kane ka jingkyrpad ka jong u la ong ba, ki skul ki dang sdang long bha mynta ar bnai, bun na ki skul ki dang lah ban pyndep ia ki jinghikai tang hapdeng 50% bad 60% hynrei ka sorkar kala pynbna ban pynlong noh ia ka selection examination na ka bynta ki khynnah “Private”.
Katkum ka jingpynbna kaba la pynmih na ka ophis jong u District School Education Officer East Khasi Hills kala bthah ia ki skul ban pynlong ia ka selection test naduh ka 25th Risaw 2021 haduh ka 05th Naiwieng 2021, katba ha West Khasi Hills District kan sdang na ka 01st Naiwieng bad kan kut ha ka 10th Naiwieng 2021.
La ong ba kane ka jingpynlong ia ka selection test kan buh ia ki khynnah ha ka jingeh namar ba kim pat pyndep ia ka syllabus, ia kane ki skul baroh ki sngewthuh ia ka jingeh jong ki khynnah bad ka jingeh ruh ia ki nonghikai, la ong ba lada ka MBOSE ka shim por saw bnai tang ban korek ia ki kot thoh eksam ki khynnah katno tam ka jingeh ia kiba hikai.
U bah Kharjana u kyntu ia baroh ki nonghikai ba kim dei ban ia khin tang ba kim ioh tulop ki dei ban mih madan ruh ba dawa na ka bynta ka jingdon kam jong ki khynnah lada ki khynnah kin shah bat ha ka selection mano ban kit klieh na ka bynta jong ki lada ki hap ban shong iing tang namar ba ki phail selection la buh ia ka jingkylli.
Ha ka jingshisha ka sorkar kala dei ban ailad ia ki skul ba kin bteng ia ka jinghikai namar ka Online Klass kam don jingmyntoi ei ei ruh em namar, lada don ka internet don ki bym don mobile bad lada don kiba don mobile kam don ka internet ia kane la kubor hi da u mytnri ba dei peit ia ka tnad pule.
U Bah Fairson Kharjana u da kyntu ia ka sorkar ba kan pyrkhat biang ia kane namar ha ka snem kaba la dep tang ia ka syllabus ruh la pynduna katta ruh kam don kata ka selection, katba mynta ki hap ban hikai 100% ia ka syllabus tang ha kine ki ar bnai kim lah ban pyndep, la kyrpad ia ka sorkar ba kan ai lat ia ki khynnah ba kin thoh phainal khlem da thoh seclection.
