Shilong, Jylliew 22: U Bah Goldenstar Khongwar mynta ka sngi u la kynnoh ba u la shah shoh ha u rangbah shnong Baridua u Bah Ioanis Narlien, ha iing jong u ha ka 19 tarik mynta u bnai.
Haba kren ha ki lad pathai khubor mynta ka sngi ha Shillong Press Club u la ong ba u sngew lyngoh ban iohi ha ki lad pathai khubor ba shah thombor u rangbah shnong, ha ka jingshisha dei ma u bala shah thombor ha u rangbah shnong bad ka kynhun jong u.
Haba jubab ia ki jingkylli halor kane ka jingshah shoh ka jong u u la iathuh ba u la leit ban pan ia ka syrnot na u rangbah shnong na ka bynta u khun jong u ban rung kam shipai hynrei ym shym la ai bad u la thlia da kumne da kumtai.
La iathuh ba ha ka 15 tarik mynta u bnai u la shah kynroi ha Iew Buridua ha ka por 7.30 ei ei pormeit bad u la lait da ka jingwan iarap ki kynthei ba don ha Iew. Ha kane ka sngi u rangbah shnong u la kura ruh ia ka kali jong u kaba u niah.
Dei halor kane ka jingleh jong u ba ki sa leit sha iing jong u rangbah shnong ha ka 19 tarik mynta u bnai por 3.30 jan miet ban ia kren hynrei mar iapoi ha phyllaw iing la mih ki briew bad kila shah ia u hapoh ak jingialam u rangbah shnong, la kynnoh u Bah Khongwar.
Ka jingleit pan ia ka syrnot na u Rangbah shnong ka long ba kila don la ka iing ka sem bad ia ka EPIC thep vote ruh kila don ha kane ka shnong Baridua, hynrei u rangbah shnong bad la iathuh ba leh se ka daw ba u la shah buh shun dei ba u la leit ban ujor sha u Syiem jong ka Hima Mylliem bad sha KHADC ia kane ka jingbym ai syrnot jong u.
Halor kane ka jingshah shoh ka jong u, kila ioh jingtip ba u rangbah shnong u la ai da ka ejahar hapoh Khanapara, halor kane ki ruh kila ai ia ka ejahar pyrshah ia u rangbah shnong ha katei ka juh ka police Out Post.
