Mairang Naitung 17: U Myntri ka sorkar jylla ba dei peit ia ka umbam umdih ha ka jylla u la ong “Nga sngewsih mynta ba ha u khasi kala rung ka mynsiem tingpud”, ia kane u la kren ha ka jingrakhe ia ka lyngkhuh sngi iap ba 184 snem jong u syiem ha Hima Nongkhlaw ha Madon Tirot mynta ka sngi ha Mairang.
Ha ka jingkren jong u kum u kongsan ha kane ka jingrakhe u bah Samlin u la ong ba ka jingrakhe ia kane ka sngi kam dei ban kut noh tang mynta ka sngi, u la kyntu ia ki nongkit kam jong ka Hima Nongkhlaw ba un ialam mu ban leh ei ei na ka bynta u Syiem Tirot Sing.
Na ka liang jong u myntri u la pynkynmaw ia kaei kaba ki phareng ki kren ba ka synshar paidbah da u paidbah dei ha Ri Khasi. Ka thma bad ki phareng kala neh lai snem bad dei na kane ka daw ba ki phareng ki la kynthoh ba ki khasi ki dei ki riewlum kiba la kiew bha.Haba phai sha ki District Council jong ka jylla bad ha kane ka thain shatei lam mih ngi ki phai khmat sha ka KHADC kum ka kmie.
U la ong ruh ba u sngewsarong ba dei tang ha Mairang ba ia ki kam ki jam baroh la trei da ki trai shnongt naduh ka kam khapsniuh haduh ki ophisar, lada buh ka jingkylla lada ha Mariang lah ban leh hawei balei um lah. Haba phai sha ka ioh kam ioh jam u la ong baroh ki kren ba ym ioh kam, haba ki kren bym ioh kam dei ka kam sorkar, ban ia ioh tang ka kam sorkar ka long ka bym lah long.
Ha kane ka jingialang u la ong ba “Ngi don kam ia ka ILP, ha ka juh ka por u la ong ba ymd ei ban rit mynsiem, haba phai sha ki kam ki jam u la ong ba um dei ban ailad ia kiwei ban shah knieh ka kam ka jam lane ka synshar khaddar. U la ong haba kynmaw ia ki riew khraw dei ruh ban kynmaw ia ka jinglen lada jong ki kumba u syiem Tirot Sing u lalen lada ha byndi namar ka Ri.
Ha kane ka sngi u la ong ba ka Hima Nongkhlaw, ryngkat ka sorkar ka dei ban wad balei ki “Stamp” jong u Tirot Sing kim don shuh wat la la pynmih ia ki ha u snem 1988. Kawei pat kaba ka Hima bad ka sorkar kin hap ban wad ka long ba ha ei la buh ia u khyndew jong ki riewialeh laitluid la buh haba la wan shim na jaka sah u Tirot Sing.
Haba ia dei bad ka jingdon kam jong ka Hima ha kaba ia dei bad ka Um u la ong ba ki nongkit kam kin ia kynduh ia u ban ia treilang na ka bynta ka jingdon kam jong ki paidbah. Kiwei kiba la kren ha kane ka sngi ki long u MDC jong ka Mairang u Bah Batskhem Ryntathiang, Dr Streamlet Dkhar, Syiem ka Hima Bhowal pa’im K N Syiem, ia ka jingialang la pyniaid da u Syiem jong ka Hima Nongkhlaw u Pa’im P Syiemlieh. Ha ryngkat ka jingiadon lang ki khun ki hajar ka hima Nongkhlaw.
Ha kane ka sngi la don lang ruh u MDC jong ka Rambrai Jyrngam u Bah Banjop Pyngrope, u Bah E Nongrang MDC barim ka Mairang, ki heh sorkar naduh u SDO bad kiwei kiwei ki ophisar hapoh jong ka Mairang Civil Sub Division.
