Shillong, Naitung 03: U MLA jong ka Rajabala u Dr Azad Zaman u la leit da lade ban jurip ia ki shnong kiba la shah ktah ha ka jingshlei um ha West Garo Hills District kiba hap hapoh ka Selsella Block.
Kane ka jingshlei um ka long na ka daw jong ka jingjur palat jong u slap, mynta ka sngi u MLA jong ka Rajabala u la leit ban jngoh ia ki shnong kiba la shah ktah ha kane ka jingshlei um bad bun ki lynti ki surok ruh kila shah pynjot.
Na ka liang jong u MLA u la pah shna ia ki jingkieng siej tang ban ioh iaid ki briew na shiliang wah sha shiliang, la iathuh ba bun ki briew ki hap ban mih na ki iing ki snem jong ki ban lait na ka jingshah tap ha ka um kaba la tyllep ia ki shnong ki thaw.
U MLA jong ka Rajabala u la iathuh ba la buh san tylli ki jaka sah ba shipor jong ki briew kiba la hap ban mih na la ki iing ki snem jong ki. Ha kane ka jingleit na ka liang jong u MLA u la ai jingiarap ia ki briew kiba don ha kine ki jaka sah ba shipor da u khaw bad kiwei ki jingdon kam.
