Ngam ioh ban donkam ban phah tohkit CBI, halor ka jingjia ha Sohshrieh: James

Shillong, Naiwieng 27: U myntri kam poh iing jong ka jylla u James K Sangma haba jubab ia ka jingiakren halor ka jingbym don shuh ka shong suk shongsain ha ka jylla ia kaba la wanrah da u Bah HM Shangpliang ha kane ka dorbar kyrpang mynta ka sngi u la ong ba “Ngam iohi ban don kam ban phah tohkit Central Bureau of Investigation (CBI), halor ka jingjia ha Sohshrieh”.

Halor ka jingjia ha Sohshrieh na ka liang jong u myntri kam poh iing haba jubab ia ka mat jingiakren, u la iathuh hapoh ka iing dorbar ba ha ka 08 tarik mynta u bnai ki pulit  kila ioh jigntip ba ka kong Agnes Kharshiing bad ka Amita Sangma kila mynsaw ha ka jingshah shoh ha ki briew kiba ym lah ban tip.

Halor kane ka jingjia la kem 6 ngut bad ngut kiba la rah ban tohkit, haba ia dei bad kane ka ain kan leh ia kaba don kam, kampher la ki dei mano manor uh ka ain kan leh ia kaba don kam la ki dei na kano kano ka seng sain pyrthei.

Haba ia dei bad ka jinglut jingsep baroh ka sorkar kala dep ban pyntip ba ka sorkar kan siew ia kaba don kam baroh na ka bynta ka jingsumar ia kine ki ar ngut kiba la mynsaw bad ka jingsiew kan long shisien ia kaei kaba la lut baroh.

Haba ia dei bad ka jingleh jong ki PSO la dep ban ai ia ka jingujor bad, halor ka jingiakjai pud bad ka jylla Assam ka sorkar ka la shim khia ia kane ka kam, halor ka jaka ka themmotor kane ka kam kam dei kaba suk ban leh hynrei ka sorkar kala shim khia ban pynbeit ia kane ka jingeh, ban kynnoh ba ka shong suk shnong sian kam long shuh ka long kaba bakla lada ia nujor ba kip or ba la leitnoh.

U myntri kam poh iing u la ong ba ka sorkar ka sngewkhia ha kaba ia dei bad ka jingshah shoh jong ka Kong Agnes Kharshiing bad ka Amita Sangma, dei na kane ka daw ba ka kabinet ka la rai ban thung ia ka Kynhun tohkit kaba laitluid ban peit ia ka jingjia baroh kaba la mih ha dien ka jignkhang tih dewiong ha u snem 2014.

Kane ka kynhun tohkit jan sdang ia ka jingtohkit naduh ka por ba la khang tihdewiong, ki jingjia ha dien ba ka khang tih dewiong ka long ka jingiap briew ha Mukhep, ka jingshah pyniap u Poipynhun Mawjaw u wei na ki nongtrei mon sngewbha.

Haba wanrah ia kane ka mat jingiakren hapoh ka iing dorbar na ka liang jong u bah Himalaya M Shangpliang, u la ong ba ka long kaei kaei kaba ym lah ban mutdur ba ki kynthei briew kin shah leh ha kane ka rukom, la ong ba ka jingtohkit ka long kaba la suki palat bad haduh mynta la kem tang hynriew ngut ki briew bad ka hukum ban ai ai jingsumar ei dei kaba la wan na ka High Court jong ka Meghalaya.

Haba ia shim bynta ha kane ka jingiakren na ka liang jong u Dr Mukul Sangma nongialam ka liang pyrshah u la ong ba ki seng trei mon sngewbha ki long kum ki nongpeit pyrman bad lada kane ka jia ka long kaei kaei kaba sngewsih, u la ong ba u dawa ba dei ban phah tohkit sha ka Central Bureau Investigation (CBI).

 

What Next?

Recent Articles

Leave a Reply

Submit Comment

*