Shillong, Iaiong 30: U Bah Sosthenes Sohtun MLA jong ka Jirang Konstitwensi u ba dei na ka seng NPP, u la ong “ ngam pyrshah ia ka jingshna surok, nga tieng ba ioh kam ka Assam ia ki jaka na kane ka jingwan shna surok sha ki bynta jong ka Balakhawa kaba hap ha Ri Bhoi District”.
Haba kren ha u SP News Agency, u MLA jong ka jingrang u la iathuh ba u la pyntip sha u myntri rangbah ka jylla u Conrad K Sangma ba ka jingshna ia ka surok da ka sorkar Assam ka dang iaid sha khmat mynta, u la ong ba un sa ia kynduh biang ia u myntri rangbah halor kane ka phang.
Ha ka jingiakynduh bad u myntri rangbah ka jylla, na ka liang jong u myntri rangbah u la bethah ia u Chief Secretary jong ka jylla ba un ia kren ia kane ka kam bad u Chief Secretary jong ka sorkar Assam ban ia pynbeit ia kane ka kam ha kaba ia dei bad kane ka jingshna surok.
U Bah Sohtun, u la ong ba ia ka jingshna ia ka surok na ka bynta ka jingmyntoi jong ki paidbah um don kano kano ka jingujor hynrei kaei kaba la juh leh da ka sorkar Assam ba ha dien ba kala pyntrei ia ki kam pynroi ka kam iaki jaka, kane ka phang kaba ka sorkar Meghalaya kala hap ban peit bha.
U MLA jong ka Jirang u la ong, na ka shithi kaba la thoh da u MLA jong ka Assam kala kren shai ba ka dei ka skhim jong ka sorkar pdeng, ia kata ym lah ban len, hynrei lada ym lah ban ia pynbeit noh mynta ia kane ka jaka ka don ka jingma ba ka sorkar Assam kan sa kam ha dien ia kine ki jaka kiba hap hapoh ka jylla Meghalaya.
U la ong ba un sa ia kynduh biang ia u myntri rangbah ka jylla halor kane ka phang un da u la poi sha Shillong. U la iathuh ruh ba ha kine ki sngi un sa leit ban jngoh da lade ia katei ka jaka ba shna surok ka Assam.
