Shillong, Nailur 23: U nongialam ka Congress Legislature party hapoh ka iing dorbar thawain ka jylla ba dei u nongialam ka liang pyrshah u Dr. Mukul Sangma u la ong ba ia ki jingeh yn ia kren bad ki nongialam ka AICC ban ia pynbeit hapoh jong ka party.
Haba kren ha ki lat pathai khubor mynta ka sngi ha Assembly, u Dr Mukul u la ong ba ki don ki bynta kiba u hap ban kun ha lade, hynrei ia ki jingeh kiba don dei ban ia pynbeit hapoh ka party, la ong ba ka kam jong u nongsain pyrthei ka dei ka kam kaba eh.
U Dr Mukul u la ong ba ka jignpeit bniah ka jong u ka long ba, haduh katno u la lah ban noh syniang katla ka bor hapoh ka party, ia kine ki jingjia baroh un sa kren ia ki nongialam ka party hapoh ka AICC ha Delhi, u la ong ba um kwah ban kren ei ei kan bha ia mynta ban sngap shuwa.
U Dr Mukul u la ong ba kapor kaia ka long kaba don kam bha namar kum ki nongmih khmat paidbah ym dei ban kynnoh ia kiwei hyrnei dei ban shim ia ka jingkit khlieh ha lade bad baroh kine ki snem ka long ba u pyrkhat na ka bynta ki paidbah ka jylla.
U Nongialam ka liang pyrshah u la ong kaba kongsan eh dei ban don ia ka jingshong suk na ka bynta ka roi ka par, u Dr Mukul u la ong ba kum ki briew ym don ba lah ban biang hynrei kaba kongsan ka long don kam ia ka jingiakyrshan.Haba ia dei bad ki kam jong ka party un sa ia kren bad ki briew kiba dei hapoh ka party ban ia pynbeit ia kane ka jingeh.
Ha kane ka sngi u Dr Mukul u la ong ba namar u kwah ban trei na ka bynta ki paidbah ha ka por ba dang khynnah u la resign na ka kam ban ai ka jingshakri ia ki paidbah, namar ka jingslem ban pdiang ia ka shithi resign ha u snem 1993 u la hap ba ia khun kum u kyrtong shimet, hynrei naduh u snem 1988 haduh mynta u la jop na ka Tiket Congress.
