Shillong, Iaiong 18: U myntri ba dei peit ia ka tnad rep jong ka sorkar jylla u Bah Banteidor Lyngdoh haba jubab ia ka mat ia kren kaba la wanrah da u Bah Himalaya Shangpliang MLA jong ka Mawsynram ban pynkylla mar rep noh ia u synsar, sla tyrpad bad u sohmarit khlaw, na ka liang jong u myntri u la ong ia kane ka kam un hap ban ia kren bniah hapoh ka tnad sorkar.
Kumba la long mynta kitei ki mar ki dei kiba la niew kum ki mar khlaw bad ka hap hapoh ka jingpeit jong ka tnad khlaw, ban wanrah sha ka tnad jong ka rep ka riang don kam ban ia kren hapoh ka tnad sorkar ia kane ka phang.
U myntri u la pynsngewshuh shuh ba ma u ruh u don ia ka juh ka jingsngewkhia namar ki briew hapoh ka jaka kaba u mih khmat ki rep ki riang ia kitei ki juh jingthung, na ka liang jong ka sorkar kan sa shim khia ia kane ban wad ia ki lad ki lynti kumno ban leh ia kane da kaba ia kren hapoh jong ka tnad sorkar.
Na ka liang jong u Bah Himalaya haba kren halor kane ka phang u la ong ba da ki hajar ki paidbah nongrep ki trei ia kane ka kam bad ka daw jong ka jinghiar ka dor jong kine ki mar hapoh iew ka dei namar ka sorkar kam pat ithuh ia ki kum ki marrep ka dang niew ia ki kum ki markhlaw, u la kynti ia ka sorkar ba ka dei ban peit ban pynkylla marrep noh ia kitei ki jingthung.
Kiwei kiba la ia shim bynta ha kane ka jingiakren ki long u Bah Syntar Klas Sunn, Bah George B Lyngdoh, Bah Meralborn Syiem, Zenith M Sangma na ka liang pyrshah. Ha ka jingkren jong ki baroh kila ban jur ia ka sorkar ba ka dei ban iarap ia ki nongrep jong ka jylla da kaba pynkylla marrep noh ia kitei ki jingthung.
Na ka liangsynshar u ba la ia shim bynta ha kane ka jingiakren u Bah Renikton L Khongkhar, ha ka jingkren jong u la ong ba ka sorkar ka dei ban wad kilad ki lynti ban lah ruh ban phah ia kine ki jingthung sha bar Ri ban export ia ki sha bar jong ka Ri.
