Shillong Nailur 08: U Chief Executive Member jong ka KHADC u bah Titosstarwell Chyne la ong ba ka Khasi Hills Autonomous District Council (KHADC) kam pdiang satia ia ka jingpynbna ne ka jingpynbna sorkar ban pynjari ia ka kyndon Civil Procedure Code (CPC) bad ka Criminal Procedure Code (CrPC) 1908 sha baroh ki jaka jong ki District Council ha ka jylla.
U Chief Executive Member ka KHADC haba kren mynta ka sngi sha ki lad pathai khubor la ong ba kin nym pdiang satia ia ka jingpynbna sorkar ba la pynmih da ka sorkar jylla ha ka sngi balang ban pyntrei kam noh ia ka CPC bad CrPc ha jylla.
Ka KHADC ha ka jingiakynduh ia u Myntri Rangbah ka jylla, kila ai jingmut ban thoh pynshai ba ka jingtreikam ka CPC kam dei kaba kynthup ia ka District Council hynrei mynta ha kane ka jingpynbna sorkar ba la pynkhreh ka la ong ba kane ka ain kan trei kam habroh ki iing bishar ha Meghalaya.
Kane ka mut kan rung lut bad kynthup lang ia baroh ki Iingbishar jong ka jylla bad jong ka District Council. Na ka liang jong ngi kwah ba ka sorkar jylla kadei ban da kdew ba ka jingtreikam ka CPC kam dei kaba kynthup ia ki District Council, la ong u CEM ka KHADC.
Katkum ka jingpynbna sorkar ka la pyni shai ba kane ka jingpynjari ia ka CPC bad CrPC kan kynthup lang ia baroh ki Iing bishar ha ka jylla kynthup ia ki iingbishar ha ki shnong ki thaw bad ki jong ka District Council, la da ka sorkar ka pynjari ia ka CPC bad CrPC kam dei ban ktah ia ki iing bishar ka District Council kaba iatyngkhuh bad ka Para 5(3) jong ka Sixth Scheduled.
Kane ka jingpynbna sorkar ka la pynduh ia ka bor jong ki District Council, u CEM u la ong ba un sa lum ia ka jingialng jong ki MDC ha ka 12 tarik Nailur ban iakren halor kane, halor kane ka jingpynbna ka sorkar kala dei ban buh teng shuwa katba ym pat ia shai.
U CEM jong ka KHADC la ong ba kane ka rai ka mut ba ki la pynduh ia ka bor jong ngi ka Council bad lada ka sorkar jylla ka iaid shakhmat, ka mut ba ladei ban khangdam syndon noh ia ki District Council namar ba kin nym don bor shuh.
Ka KHADC kam hun ia kane ka jingpynbna ka sorkar namar ba kane ka a mut ba kynthup ia baroh ki Iingbishar ha baroh kawei ka jylla kynthup lang ruh wat ia ka Iingbishar ba la thaw da ki Distrcit Council, la ban biang u CEM ka KHADC.
