Resubelpara, Naitung 27: U myntri rangbah ka jylla u Dr Mukul Sangma u la ong ba ka dei ka kam jong ka sorkar bad kum juh rung ki paidbah nongshong shnong ban ia snoh kti lang ban ai ka jingkyrshan ia ki district ba dang shu thaw thymmai, u la kyntu ia baroh ki ophisar kiba don ha ki District ba kin kham pynlait jingmut ban tip ia ki jingdon kam jong ki District ha ki kam pynroi.
Ia kane u myntri rangbah u la kren mynta ka sngi ha kaba u la leit ban ia shim bynta ha ka jingrakhe ia ka jingdap san snem jong ka North Garo Hills District kaba lalong ha Resubelpara. Na ka liang jong u myntri rangbah u la pynkynmaw ia ki por kiba la leit noh, u la ong ba bun na ka por la pynlut ha kaba pynbeit ia ki jingeh, ym don shuh kapor ban peit ia ki kam pynroi.
U myntri rangbah u la ong ba kam pat juh don ka par ba ka sorkar kan don ka jingpahuh pisa, hynrei wat hapdeng ka jingeh ka sorkar kala ialeh ban pynrulong ia ka jingangnud jong ki paidbah, kumba ka ki khun samla kila sdang ban duh jingkyrmen bad kane ka jingsngew kan wanrah ia ka lawei kaba dum. Ban weng ia kane ka jingeh ka sorkar kala leh ia kaba don kam san snem mynshuwa ban thaw ia ka Disrict.
U Dr Mukul u la ong ba kam don jaka ban ia leh jaipdeh, hap ban leh ia kiei kiei katkum ka juk kaba mynta jong ka juk stad science. La ong ba lada kwah ba kiew ki kmie ki kap ki dei ban kyntu ia la ki jong ki khun ba kin leh bha ha ka jingpule ka jong ki bad ba kin trei ia ki kam kiba ka sorkar kala plie ki lad ki lynti ha ka jaka ban leit sha ki nongmih khmat ban wad kam.
Mynta ka sorkar kala wanrah ia ki rukom trei kam kiba thymmai ba wat kito kiba khlem pat pass matrik ruh kila lah ban apply kam katkum ka jingtbit ka jong ki. Halor ka jingdawa jong ki paidbah ban don noh ia ka hospital ba 100 jingthiah bad ia ka skul JNV na ka liang jong u myntri rangbah u la ong ba ka sorkar kan sa leh ia kaba don kam.
Ha ka jingkren jong u MLA kane ka jaka u Salseng C Marak u la ong ba naduh ba ioh ia ka District ka roi ka par kala sdang ban paw, ia ki jingduna kiba dang don mynta ka sorkar kan sdang ia leh ban pynbiang namar kine ki dei ki jingdon kam kiba long man ka por hakane ka sngi la don lang ruh bun kiwei kiwei ki MLA kiba dei na ka seng Congress. Ha kane ka sngi la don ruh ka jingthung dieng.
