Shillong, Nohprah 30: Mynta ka sngi ki Seng bhalang bapher bapher kila pynlong ia ka jingkynmaw burom ia ka lyngkhuh sngi iap kaba 159 jong u khlawait, u riew ialeh lailuid jong ka Ri bad ka jaidbynriew u Kiang Nangbah, ha ki jaka bapher bapher jong ka Ri Khasi Jaintia. Ha Shillong ka Khasi Students Union kala pynlong ia ka jingbuh syntiew ha khmat u Mot Kiang Nangbah ba don ha Barik pyrshah ka Civil Hospital Shillong.
“Haba puson ia ka rukom long rukom man jonng u Kiang Nangbah, ka long karei kaei, shibynta kaban iai kyrsiew ia kane ka pateng ka jong ngi kaba mynta, kaba pynlong ia ngi ban ia lum lang kumba ka long mynta, kum ka jaidbynriew ki don bun ki riewlen lade kiban aiti na ka bynta ka Ri bad ka jaidbynriew baroh kawei” la ong u samla Lambokstarwell President ka KSU.
“Ha kane ka khyllipmat kaba u Kiang Nangbah u la leit noh na kane ka sla pyrthei 159 snem mynshuwa, hynrei ki kam rangbah bad kita ki jingleh lada ki jong u ka iai kren briew na kawei ka pateng sha kawei pat ka pateng, ka wan pat ka jingkylli ha ngi wei pa iwei, hato ngi kwah ban iada da ka lynti kaba kumno ha kane ka pateng kaba mynta” la ong u President ka KSU.
Ban jubab ia katei ka jingkylli na ka liang jong u nongialam ka seng KSU u la ong ba ka ei ka kamram jong u wei pa u wei ban thaw thymmai ban pyrkhat pyrdain ban ia khun pyrshah ia kiei kiei kiba wan ban lynshop ia ka jaidbynriew bad kata ka dei ka kamram u dkhot ba pura jong ka jaidbynriew ban shim ia kano ka sien jam shimet shimet kaba lah ban thaw thymmai ba lah ban long ka atiar ban pynskhem ia ka jaidbynriew.
Haba phai sha ka seng, la ong ba kum kane kala shim shibun ki mat kiba ka seng ka juh ia kren, la ong ba ki mat kiba kongsan eh kaba ka seng kala juh dawa ka long ka Inner Line Permit bad ka jingdawa ban pynrung ia ka ktien khasi ha ka khyrngit kaba phra jong ka Riti synshar jong ka Ri India, kine ki jingdawa kila iaid kip or bad kila tyllun ki snem hyrnei kine ki jingdawa ki dang sah ha ki jingpoh sniew.
Halor kitei ki ar tylli ki jingdawa kum ka jylla bad kum ka jaidbyrniew ki dang ap kmang la ki jingdawa kin urlong ne em, sa tang shisngi ynsa khyllipa noh ia u snem 2021, la pynkymmaw ia ki shnat trei kam bapher bapher jong ka seng kin hap ban pyrkhat thymmai ia ki sien jam ban shim nangne sha khmat.
La ong ba ka por ka dawa bad ka por ka khot ia uwei pa u wei u samla jong ka jaidbynriew bad ban kyrtiangdien ia ka jignkhot jong ka jaidbynriew, ki nongialam ba ha shuwa kila lam lynti bad kane kan dang iai pyrsat mynsiem ia ki mat ki jura bad ban pynurlong ia kane don kam ia ka jingiasnoh kti lang da baroh la don ha kano kano ka bynta ruh kum ka seng kan dang iai bteng ban pynsngew ia ki nongsynshar kiba pyrshang ban leh kyllut.
Ha kane ka sngi la pynkynmaw ba kum ka seng kan nym ialad iano iano kiba thmu ban thombor ia ka jaidbynriew, ki jingeh kiba don ha kaba don ki long ki mawpun ban jam sha khmat ban pyntyllun ia ka jingtreikam bad ban ai ia kaba bha tham ia ka pateng mynta bad na ka bynta ka jingshong shngian ka pateng ban wan bad ba kin nym shong thati ban kren ban ioh ia ki ain ban iada ia ka jaidbynriew baroh kawei.
Ha kane ka sngi la kren ruh da ki nongialam barim ka seng u bah Augustar Jyrwa bad ka jingbuh syntiew ka long na ki dkhot ka seng kmie bad na ki shnat jong ka seng na ki dong ba ki jaka bapher bapher jong kane ka nongbah Shillong. Kiwei kiba la buh syntieng ki long ka Seng Raid Shillong, ka seng Congress bad bun ki riew shimet ruh kila buh syntiew ban burom ia ki tei u riew ialeh laitluid ka Ri.
