Shillong, Nohprah 10: Ka jingialang jong ka cabinet kaba la long mynta ka jan miet kala shim ia ka rai ban leit ia kynduh ia u Lat jong ka jylla u Tathagata Roy ban ia kren biang halor ka Meghalaya Residence Safety and Security (Amendment) Ordinance 2019.
Haba kren ha ki lad pathai khubor ha kadien ka jingialang jong ka cabinet u myntri rangbah ka jylla la ong ba ha dien ba la pdiang ia ka Citizenship Amendment Bill, 2019 ha Lok Sabha, na ka liang jong ka sorkar kan leit ban ia kynduh ia u lat ka jylla ban ia kren halor ka MRSSA Ordinance bad ka sorkar kan leit ban ia kynduh ruh ia u Amit shah myntri kam poh iing jong ka sorkar pdeng.
U Myntri rangbah u la ong ba kiba bun ki paidbah ki don ka jingsngew syier ba kane ka CAB kan long ka lad ia ki briew ban wan rung sha kane ka jylla. U la ong ba u burom ia ka jingsngew jong ki paidbah ha kun kame ka khep, ha ka juh ka por ruh don kam ban tip ia ki jingshisha bad hap ruh ban pynshai ban ia tip.
U la iathuh ba ha ka sngi ba ki leit ban ia kynduh ia u myntri kam poh iing sorkar pdeng kim don jingtip ei ei ruh em ha kaba ia dei bad ka CAB dei na kata ka daw ba kila pyrshah ia ka CAB, hynrei kala don ka jingkylla ha kaba wanrah ia kane ka CAB kaba mynta 2019.
Kita ki jingkylla ka long ba u snem 2014 un dei u snem ot kyrteng bad ha dien kata yn nym lah shuh ban pdiang. kumba ka long ka jylla Meghalaya haduh mynta ki don tang lai tylli ki alpikoshon bad kane ruh ka shong ha ka sorkar jylla ban pdiang ne kyntait shuwa ban phah sha ka sorkar pdeng.
Ka jingkylla ha ka CAB ka long ba ki jaka ba don ia ka ILP bad ia ki Sixth Schedule kan nym trei kam, dei halor kane ka nongrim ba ka Agatha kala kyrshan ia ka CAB. Hynrei na ka liang jong ka sorkar jylla kan dang ia kynduh ia u myntri kam poh iing ban ia kren na ka bynta ban pynlait ia ka jylla baroh kawei na ka CAB.
Na ka liang jong ka sorkar jylla kan dang leit ban ia kynduh ia u myntri kam poh iing ban dawa ba ka jylla ka dang don kam shuh shuh ia kilad jingiada na ka jingwan tur kyrthep jong kiwei ki jaidbynriew sha kane ka jylla. U myntri rangbah u la ong ba u don ka jingkyrmen ka sorkar pdeng kan sngap kumba kala juh sngap ha kip or ba la leit. U myntri rangbah u la ban biang ba ka jingsngewkhia ka dei halor ka jingwan tuid ki briew kiba na bar.
