Shillong, Jylliew 26: Kane ka long ka jubab jong u Bah Forwardman Nongrem president jong ka seng KSU jong ka South West Khasi Hills District haba pynshai halor ka nongrim ba ka seng KSU ka pyrshah ka daw tynrai ka long ba ka sorkar pdeng kan shna ia kane ka surok ka long beit ban tih Uranium bad kane kala paw shai na ka jingpynbna jong ka sorkar pdeng ha u snem 2010, kane ha run ka long ka jingkren jong u tei u heh ka KSU ha ka jingkylli kiba la buh ha khmat jong u da ki lad pathai khubor. Ha kaba la pynmih kumba ka long.
1Jubab : Ka KSU kam don kano kano ka jingpyrshah lada ka sorkar kan pynbha ne siang rong tang iaka surok ba la don lypa namar ngi sngewthuh ba ka surok kaba bha ka dei u budlum iaka ioh ka kot ha kane ka thain hynrei ngi pyrshah tang ia kane ka Two lane ba la mang lyngba ka SARDP-NE halor kane ka nongrim ” Ka Ministry of Roads, Transport & Highway lyngba ka Cabinet Committee on Infrastructure haka 7th April 2010 ka la mynjur ban mang tyngka ia kane ka Two Lane na Nngstoin-Mawthabah ha ryngkat ka objective kaba ong ‘To facilitate Mining of Uranium in Meghalaya’ katba kum ka notification ba la pynbna paitbah ha ka 10th April 2010″. Ka jingdawa ban pynbha ia kane ka surok ba la don lypa lei ka dei kaba donkam bad ka seng ka la iaid shakhmat ruh ban dawa na ka sorkar naduh ki por ba mynshwa bad dang haka snem ba la leit ngi dang phah ruh iaka jingthoh shaka sorkar lyngba ka DC jongka South West Khasi Hills.Ngi kren da kaba shai sha ki paitbah ba ngim pyrshah iaka jing pynbha iaka surok ba la don lypa hynrei ngim kwah ban ailad iaka Two lane naba ngi tip shai ba kane ka thain kam pat donkam two lane hynrei tang ka jingpynbha bad siang rong iaka surok ba la don lypa ruh ka lah biang. Ban ai syndon daka Two Lane sha kane ka thain ka pynpaw shynna ba ka sorkar kam mut na ka bynta ka suk ka sain u paitbah hynrei ka thew sha u uranium khnang ban suk ha ka ban kit ban bah ia une u marpoh khyndew. Ngi kwah ban iohi iaka surok kaba bha ha kane ka thain hynrei ym ka Two lane namar ngi tip shai ba ka sorkar India ka kwah hirhir ia une u marpoh khyndew uba lada ngi bakla ban rai mynta lehse kan long ka jingtim lashai lashisngi.
2 Hato ka seng kan sngew kumno lada ka sorkar jylla ka rah noh shawei ia kane ka project surok ne ka rai ban nym shna shuh ha ki bynta jong ka Wahkaji bad Mawthabah?
Jubab : Kumba ngi la kren da kaba shai ba ngim kwah iaka Two Lane ka shong haka jingstad jongka sorkar ba kan rai hynrei ngi long kiba la pynkhreh ban iakhun da kano kano ka lynti lada ka pyrshang ban pynurlong ban Shna iaka Two Lane. Kane kam mut pat ba ngim kwah iaka surok ba bha ha kane ka thain namar kumba nga la kren mynne ngi kwah ba ka sorkar kan siang rong tang iaka surok ba la don lypa bad lada ka sorkar kam leh ia kane ne ka shim rai ban nym pynbha shuh ia kane ka surok kata kan pyni ba ka sorkar ka mut tang ban pynsuk ban kit ia u uranium hynrei ym ba ka don jingkitkhlieh ban pynsuk ia u paitbah katei ka thain bad kan pyni shynna ruh ba ka sorkar ka buhrieh iaki jingthmu ba sniew jongka ha ka kyrteng jongka roi ka par(development)
3 Lada ka MoRTH ka pynmih iaka jingpynbna (Notification) ba ka jingshna ia ka surok kam dei ban ioh tih Uranium, ka seng kan bteng ban pyrshah ne kan ailad noh ban shna surok?
Jubab : Lada ka dang dei ka Two lane ngin iai bteng iaka jingpyrshah jongngi hynrei ngi kren da kaba shai ba ngi long kiba la kloi ban kyrshan iaka sorkar ne ka Ministry of Roads, Transport & Highway lada ka weng iaka Two Lane bad pynbha ne siang rong shwa tang ia kaba la don lypa ha kaba kata kan wan lyngba ka State Government bad ka department ba dei peit jongka sorkar jylla. Ngin jin da la sngewnguh bad sngewkmen shikatdei eh lada ka sorkar kan ai surok sa ha kiba bun ki shnong jong katei ka thain ki bym pat phohsniew ban iohi ba ka surok kan poi haki shnong jongki.
4 Kum u nongialam ka seng phi sngew kumno halor ka jingkyntu ki nongialam shnong bad ki seng bhalang kiba kyrshan surok, da kaba ong ba ki seng kiba ieng pyrshah ki dei ban iatylli lang kawei ban kyrshan tang ban shna iaka surok bad ban ieng tylli lang kawei pat ban pyrshah horkit hordang ban tih ia u uranium bad ryngkat lang yn ia pynlong da ka jingiakhih kaba tyngeh, hato ka KSU kan pdiang ia kane ?
Jubab : Ngim lah ban len ba naduh u snem 2004 terter ki don katto katne ki nongialam shnong katei ka thain bad ki sengbhalang kiba kyrshan ia u uranium hynrei ki don ki juh katto katne mynta pat ki ong ngi pyrshah uranium hynrei kyrshan iaka surok Two Lane(Surok Uranium). Kumba ka seng ka ieng ha kajuh ka nongrim naduh mynshwa ban pyrshah uranium bad iaki pre-uranium development activities mynta ruh ka pyrshah jur ia kane ka surok Two lane.Kum ka seng ngim kwah ban kren arsap (double standard) ban ong ngi pdiang iaka Two lane hynrei ngi pyrshah ia u uranium.Kumta, ngi ruh ngi kyntu iaki nongialam shnong katto katne bad iaki sengbhalang ban kylla bamut bad ban iatylli lang kawei ha ka ban pyrshah ia kane ka surok Two lane bad dawa naka sorkar ba ka dei ban pynbha ne siang rong tang iaka surok ba la don lypa. Ym tang katta ngi kyntu iaki ba ngin iatreilang ban dawa surok sa haki phew tylli ki shnong jong katei ka thain ki bym pat don surok haduh mynta.
5.Haka 15 tarik u July 2016 kan don ka jingialang jong ka sorkar ban shim rai halor kane ka surok kaba ka KSU ka pyrshah, ka seng ka kwah ba ka sorkar kan shim rai da kaba kumno ha katei ka sngi??
Jubab : Kumba ngi la dawa na ka por sha ka por na ka sorkar na ka bynta ka roi ka par jong katei ka thain. Ngi kwah iaka sorkar ba lada ka sngewkhia shisha ia ki jingeh ba ki paitbah ki mat ka dei ban shim iakine ki rai harum :-
(a) Ha ka 15 tarik July 2016,sorkar ka dei ban shim iaka rai ban pynsangeh ia kane ka Two lane project hynrei ban ialeh katba lah ban pynbor iaka sorkar kmie ba kan siang rong noh shwa tang ia kaba la don lypa ka ban iaid ruh lyngba ka state bad ka competent department jongka jylla kumba kane ka surok ka dei ka State Road. Ym tang katta, ngi dawa ruh naka sorkar ba ka dei ban shim rai ban thaw ki approach roads shaki phew tylli ki shnong katei ka thain ki bym pat lait Kali haduh mynta.
(b) Lada ka sorkar ka don ka jingkitkhlieh na ka bynta katei ka thain ka dei ban wanrah noh sha Umdohlun/ Wahkaji ne kano kano ka jaka ba kham long pdeng iaka C&RD Block bad ki office jongki tnad bapher bapher sha katei ka thain naba ki paitbah ki hap leit pyndep iaki kam ki jam shaduh Mawkyrwat bad Ranikor kiba la long kham pajih ba kane ka thain. Ngi dawa ruh ba kadei ban shim rai ba ka UCIL ka dei ban aiti noh shaka Health Department iaka Wahkaji PHC namar kane ka PHC ka la shu sah ing jah mynta la palat 15 snem . Ngi kyntu ruh ba ka sorkar ka dei ban shim iaka rai ban Kyntiew iaka pule puthi ha katei ka thain da kaba wanrah khambun ki Government Sec. & Higher Sec. School bad ruh kawei ka College sorkar ha katei ka thain. Lada ka sorkar ka shimkhia ia Kane ka thain ka dei ban pyni iaka jingbymlong arsap jongka da kaba pynurlong ia kine ki mat kiba katei ka thain ka la i donkam kyrkieh mynta ka kynti.Kane ka long katkum ka jingjubab jong u Bah Frowardman Nongrem President KSU South West Khasi Hills.
