Shillong, K.Lyngkot 26: U Myntri Rangbah ka jylla u Cornad K Sangam haba kren ha ka jingrakhe ia ka Republic Day kaba 73rd ha madan Polo la ong ba ka sorkar ka iohi ba ka jingtrei kam ha kaba ia dei bad ki nongkyndong 70% ka dei lyngba jong ki Blok.
Ban pynbha shuh shuh ia ki jingtrei ka sorkar sha ki nongkyndong ka sorkar kala shim ram na ka NABARD kumba T.1300 klur tyngka ban shna ia ki ophis trei kam ha ki 40 tylli ki Blok na ki 46 tylli kiba don ha ka jylla, da kane ka pisa yn shna ruh ia ki ophis ha ki District bad ki Civil Sub Division.
Ka sorkar kala iohi ruh ia ka jinglong rynjain ki thanad ha ki bynta bapher bapher jong ka jylla bad na ka liang jong ka sorkar kala mang pisa T.100 klur ban pynbha bad ban tei ki Police Station ba thymmai.
Ha kane ka sngi u Mytnri Rangbah ka jylla u la kren ia shibun ki kam pynroi kiba ka sorkar kala pyntrei ha kine ki snem na ka bynta kan kyntiew ia ka jylla ha baroh ki liang, u myntri rangbah u la kdew ba shuwa ka snem 2018 ka jingpynlut jong ka sorkar ka long kumba T.9000/- klur ha ka shisnem katba mynta ka jingpynlut kala kot sha ka T.14000/-klur.
Kane ka pynisha ba bun ki kam pynroi kiba ka sorkar kala leh, ha kine ki saw snem, la ong ba ka jingshna ia ki surok lyngba ka skhim PMGSY, ban kiwei kiwei ki skhim kiba wan na ka sorkar pdeng bad kiba na sha bar jong ka jylla Ri ki jingbei pisa kila wan ban kyntiew ia ka roi ka par ha ka jylla.
Haba phai kyrpang sha ki khynnah hapoh ka jylla u mytnri rangbah la ong ba 40% na ki khynnah kim ioh ia ka bam kaba biang bal ah ban tei met, la ong ba kaba kongsan eh ban kyntiew ia ki khynnah ka long ba kin ioh ia ka bam ka biang hapoh ka 8 snem ka rta ban leh ia kane ka sorkar kala ioh ia ka pisa na ka World Bank ban ai bam ia ki khynnah.
Haba phai sha ka jinglum ia ka khajana, ha ka shisnem ha ka jylla, la ong ba ka jingmih na ka jylla Meghalaya na ki khajna kiba bun jaid kala kot sha ka T.3000/- klur bad kaei kaba ki ioh na ka ki khajna kiba dei na ka sorkar pdeng ka long T.5000/- klur ha ka shisnem.
Ki jingiarap kiba wan sha bar ha shuwa u snem 2018 ka long T.2500/- klur bad mynta kala kiew sha T.7500/-klur. Kane ka dei namar ba ka sorkar ka lah ban pyndep ia ki kam pynroiha ki bor ba biang bad ha u snem ba ka jylla Meghalaya ka dap 50 snem kin don 300 tylli ki kam pynroi ban plie ia ki.
Ka sorkar kala iohi ba ka jylla kala don kam ia ki jaka trei kam kiba thymmai dei na kane ka daw ba ka sorkar kala thied jaka palat 800 akar ha thain Madaniangdiang ia kaba la buh ia u mawnognrim ban tei ia ki iing sorkar ban rah ia ka Secretariat sha katei ka jaka ban pynkylluid ia kane ka nongbah Shillong.
Ha ka juh ka por u myntri rangbah ka jylla u la pynpaw ruh ia ki jingeh kiba kin dang mih sha khmat khamtam ha kaba ia dei bad ka jingkylla ka suin bneng kane kan long ka jingeh kaba khraw ia kaba kum ka sorkar kan sa pyrkhat bha kumno ban iada.
Ha kane ka sngi u mytnri rangbah ka jylla u la sam ruh ia ki khusnam sha ki nongjop ha ki jingiakop bad kum juh kiba la shah jied ia ka khusnam ha ki bynta bapher kiba la juh sam ha kum kane ka sngi kum ka jingburom ia ki kam kaba ki leh.
