Shillong, Jylliew 17: U bah Titosstarwell Chyne Chief Executive Member jong ka Khasi Hills Autonomous District Council (KHADC) haba kren ha ka jingialang ban plie ia ka “Media Centre” ka kamra na ka bynta ki nongthoh khubor ha Legislative Wing ha KHADC u la ong ba ki lat pathai khubor kim dei ban ia don liang.
“Ngim kwah ban ioh sngew ba phin ia don liang, kum ki nongthoh khubor ki dei ban long kiba laitluid khlem da shah pyniaid hano kano ban ai ia ka jingshakri sha ki paidbah, ym kum ki politician kiba ia don lang liang la ka jong ka jong ka party” la ong u bah Titosstarwell haba kren kum u kongsan haba plie ia ka media centre ha KHADC.
U CEM jong ka KHADC u la ong ba ha ka jingshisha kane kala dei ban long kam la kham slem hynrei na ki daw kiba ym lah ban kiar kane ka kam kala sah teng hynrei mynta ka sngi la lah ban pynurlong. Kane ka dei ka jingsdang bad ka kamra ka dei kaba rit hynrei kin sa wat lad ban ai da kaba kham heh lada don kam.
Ha ka jingkren u Lamphang jong ka KHADC u Bah Pyniaid Sing Syiem, u la ong ba na ka liang jong ka ophis kala pyrshang ban pynbiang ia ki saw tylli ki kor Komputer na ka bynta ki nongthoh khubor ryngkat ka Internet ba kin ia pyndon kam, la ong ba ia kane ka kamra ym plie tang ha ka por long ophis.
Na ka liang jong ki lat pathai khubor la kren da u bah Starfing Pdahkasiej Editor jong ka SP News Agency, ha kaba u la ong ba kane ka jingangnud jong ki nongthoh khubor ban ioh ia ka kamra ha KHADC ka dei kaba la slem bad mynta ka sngi kala urlong, la ai ka jingkular ba ia kaei ka ophis ka ain na ka liang jong ki nongthoh khubor kin sumar ia ki bad la pynpaw ia ka jingkhublei ia kane ka Executive Committee kaba la pynurlong ia kane ka jingpan ki nongthoh khubor.
Kiwei kiba la kren ha kane ka jingialang ki long u Deputy Chief Executive Member u Bah Gigur Myrthong, EM bah Teiborlang Pathaw, u Nongialam ka liang pyrshah u bah Lamphrang Blah. Kine baroh kila pynpaw ba ki lat pathai khubor ki la shakri shisha na ka bynta ban ai jingip sha ki paidbah.
Ha kane ka sngi la don lang ruh kiwei ki EM,ia ka jingialang la pyniaid da u Bah M Kharkrang Secretary jong ka Legislative Wing jong ka KHADC bad ia ka jingkren ai khublei la kren da u Joint Secretary. Ha kane ka sngi ki nongthoh khubor ruh kila ia poi lang ban sakhi ia kane jingplie ia ka Media Centre.
