Shillong, Nohprah 11: ka jingpyntrei kam jong ka tnad pynroi nongkyndong lyngba ki Block ha kane ka jylla Meghalaya ban thaw ia ki “Gram Sabhas” ha ki shnong ki thaw, kala pynlong ia u Chief Executive Member jong ka KHADC u bah HS Shylla ban khot ia ka jingialang jong ka executive Committee ban ia kren halor kane ka phang namar ka iatyngkhuh bad ki dorbar shnong.
Haba kren ha ki nongthoh khubor ha dien bala kut ka jingialang jong ka EC, u bah HS Shylla u la ong ba ha kane ka jingialang kila shim ia ka rai ban leit ia kynduh ia u myntri rangbah ka jylla u Conrad K Sangma ban pan jingshai na ka sorkar ba kumno la pyntrei kam ia kane ha ka jylla Meghalaya kaba hap hapoh ki Sixth Schedule katkum ka Artikle 243(M) ba kan Panchayatiraj kan dei ban trei kam ha ki jaka ba don ki District Council khylem da kynjoh ktien.
U Bah Shylla u la ong ba kane ka jingleh jong ka sorkar pdeng ban wanrah ia ka “Gram Sabha” ha ki shnong ki thaw ka long ba ka sorkar pdeng bad ka sorkar jylla ka pyntrei kam ia ka Panchayatiraj ha kane ka jylla da kaba wan na kyrpang iing kumba la leh ia ka skhim bylla shispah sngi ia kaba la tip kum ka NERGS. Kane ka skhim kaba ka sorkar pdeng ka kwah ban leh ka dei na ka “Eleventh schedule” jong ka Riti synshar jong ka Ri ha kaba ki don 29 tylli ki jaid skhim bad kane ka “Gram Sabha” ka dei kawei na ki bad kum juh ka NERGS.
Na ka liang jong u Bah Shylla u la ong ba lada ka sorkar pdeng ka kwah ban leh ha kane ka sorkar lane ka sorkar jylla, kala dei ban pyntrei kam pura ia ka “Eleventh Schedule” jong ka Riti Synshar jong ka Ri India, khlem da ktah ia ki dorbar shnong kaba iaid lyngba jong ka Sixth Schedule. Lada pyntrei kam pura ka jingmyntoi kan long ia ki paidbah ka jylla ym ba kan wan na kyrpang iing kumba ka long mynta.
Ka KHADC kam don kano kano ka jingpyrshah ia ki kam pynroi na ka bynta ka jingmyntoi jong ki paidbah, hynrei lada ki don ki “Gram Sabha” ha ki shnong ka long ba ka jingjied ia ki nongkit kam kan long da baroh ki paidbah nongshong shnong ha kaba ki dorbar shnong kin sa duh noh ia ka bor jong ki ia kaba la don baroh shikatta.
