Shillong, Rymphang 04: Mynta ka step la lap ba ha ka jaka ba thmu ban pynlong ia ka jingialang ka Kabinet kaba nyngkong hapoh Jiantia Hills District, ha iing basa sorkar kaba jer kyrteng ka “Mih Myntdu Quest House” la shem ba la don ki jingthoh “No ILP No Cabinet”.
Katkum ki jingtip kiba la lah ban iohi la ong ba ia kine ki jingthoh la lap mynta ka sngi ha ka por mynstep, kiei ki kynhun ne mano ba thoh ia kane ruh ym don ba tip haduh mynta, ia ka jingialang ban pynlong ia ka Kabinet la buh ban pynlong ha katei ka jaka mynta ka sngi.
Katkum ki jingthoh kiba la thoh ha ki kynroh ka jingpyrshah ia ka jingpynlong ia ka Kabinet ha Jowai ka dei namar ba ka sorkar pdeng khamtam myntri kam poh iing ka sorkar pdeng ym pat lah ban ai ia ka jingmynjur ia ka jingdawa Inner Line Permit ha ka jylla.
Ha ki jingthoh kiba la don ha ki kynroh la ong ba la thoh shai ba ka sorkar jylla katba ym pat ioh ia ka ILP, ka dei ban phah sign noh ia u Lat jong ka jylla ban pyntrei kam ia ka Ordinance MRSSA jong ka jylla.
