Shillong, Iaiong 27: Ka Khasi Students’ Union (KSU) Central Executive Council ka la ia kynduh kyrpang ia saw ngut ki samla Khasi ki ban leit ia shim bynta ha ka IX World Cup Kick Boxing – WAKO 2018 ka ban long naduh ka 30.05.2018 haduh ka 04.06.2018 ha ka nongbah Anapa jong ka ri Russia.
Ha kane ka jingiakynduh kaba la long ha ka ophis treikam ka seng ha Jaiaw ha ryngkat ka jingiadonlang ki dkhot ka Meghalaya State Kickboxing Association na ka liang jong ka KSU kala ai ka jingkitbok kitrwiang ia kine ki saw ngut ki samla ban kin ioh ban mad ia ka jingjop bad ba kin wanrah ka burom kaba khraw ia ka Ri bad ka Jaidbynriew Khasi baroh kawei.
Ka seng ha kane ka sngi ruh ka la ai jingiarap khyndiat ia kine ki samla ki ban leit ia shim bynta ha katei ka World Cup ha ri Russia bad ka la pynpaw ia ka jingkmen halor ka jingthrang bad jingangnud jong kitei ki samla kiba lyngba ki jingeh bad ki jingtynjuh kiba har rukom hynrei ki la kut jingmut hi triang ban ban iakhun haduh ban da poi sha ka thong.
Ka seng lyngba ka jingiakynduh ka jong ka ia kine ki samla ka la shem ruh ba ka long kaei kaei kaba sngewsih ba namar ka jingduna palat ka jingnoh synniang na kiba bun ki liang ha kane ka jait jingialehkai ka la pynlong ia ki samla ba ha ka jaka ba kin ioh ban pyntbit shuh shuh ia lade lyngba ki jingkilan met na ka bynta katei ka jingiakhun hynrei ki bapli ki hap pynban ban mareh kylleng kylleng ban wad jingiarap ha ka liang ka pisa khnang ba kin ioh ban leit ia shim bynta ha katei ka jingialehkai.
Ki samla ki ban ia shim bynta ha katei ka jingiakhun ha ri Russia ki kynthup ia u samla Hameshaniah Suiam u ban ia khun ha ka Senior Men – Below 57 kg, Point Fighting and Kick Light. U ne u samla uba na ka shnong Shangpung, West Jaintia Hills u dang don ruh ha ka jingpule B. Sc Electronics 3rd year ha St. Edmund’s College bad u la mihkhmat haduh lai sien na ka bynta ka ri India kata ha u 2014 ha Rimini, Italy, ha Dublin, Ireland ha u snem 2015 bad ha Budapest, Hungary ha u snem 2017. Une u samla u la ioh haduh 4 tylli ki takma ksiar ha ki jingialehkai ha ri India.
U samla Pynehborlang Mylliemngap uba la haduh 4 tylli ki takma kna ka ri India bad kawei ka takma ksiar ha ka Asian Confederation Kickboxing Championship 2017 kaba long ha ka ri Turkmenistan. Une u samla u ang pule ha ka kyrdan XI bad u dei na ka shnong Smit Mawmluh, East Khasi Hills.
u samla Babit Kharsohnoh uba na Smit Mawmluh uba dang pule BA 2nd Semester ha Shillong College u dei uba la ioh kawei ka takma rupa na ka ri India bad u dei ruh u North East India Gold Medallist.
U samla Elbring Elb Umbah uba dei na Mawtari Raid Thaiang Mawhati, Ri Bhoi District, uba dei u nongrep bad uba la ioh ar tylli ki takma ksiar na ka ri India.Ka seng ka kitbok kitrwiang ia kitei ki samla ba kin ioh mad ia u namjop bad ka kyntu ia baroh ki paid ka Bri U Hynniewtrep ba kin buh ka jingduwai na ka bynta kitei ki samla khnang ba kin ioh ban pyndep ia ki jingangnud ki jong ki.
