Shillong, Nohprah 10: Mynta ka sngi ha ka por jan miet ki paidbah jong kane ka nongbah Shillong palat hajar ngut kila ia mih paidbah ban ia shim bynta ha ka jingthang ia ki tyngshop jong u Myntri Rangbahduh jong ka Ri India u Narendra Modi, u myntri kam poh iing u Amit Shah, ia u Lat jong ka jylla u Tathagata Roy bad ia ka MP na Tura ka Agatha K Sangma ba dei jong ka NPP kaba la kyrshan ia ka CAB.
Shuwa ban thang ia ki tyngshong kila don ki nongkren na ki kynhun bap her bapber ha kaba kila pynpaw ia ka jingsngewnsih ban iohi ba ka party NPP kaba ialam ia ka sorkar ha ka jylla kala ai ka jingkyrshan ia ka CAB lyngba ka MP jong ka ka Agatha K Sangma hapoh parliament.
U wei na ki nongkren u la ong ba ha ka 30 tarik ha Delhi ki dang ia soi ia ka dorkhas ban ai sha u myntri kam poh iing ban pyrshah ia ka CAB, hynrei pluk la shah dung na sha dien ha kaba ka Agatha kala ai ka jingkyrshan ia ka CAB. Bun na ki nongkren kila pynpaw ba ka jylla ka don kam ia ka ILP.
Ha kane ka sngi kum ka dak jong ki pyrshah ia ka CAB kala don ka jingiaid paidbah na Madan Iewrynhep ha Laitumkhrah bad poi sha Motphran ha kaba la ia shim bynta da ki spah ngut da kaba iaid kjat.
Ha Motphran palat hajar ngut ki paidbah kila ia poi lang ban pynpaw sha ka sorkar pdeng ban ki paidbah jong ka jylla Meghalaya ki pyrshah ia ka CAB. Ha ka juh ka por ki dawa ba dei ban pyntrei kam ia ka ILP ha kane ka jylla. Ia ka jingialang la pyniaid da u Donboklang Kharlyngdoh.
