Shillong, Naitung 03: Mynta ka sngi ka seng ki kynthei ia kaba la ai kyrteng ka “STIEH) kala pylong ia ka jingialang paidbah ha Khasi National Dorbar Hall ha Mawkhar ban pynpaw ba kum ki kynthei ka jaidbynriew khasi ki ai ka jingkyrshan ia ka Khasi Hills Autonomous District (Khasi Social Custom of Lineage) Second Amendment Bill, 2018.
Ha ka jingialang paidbah palat hajar ngut ki kynthei bad ki rangbah kila ia poi sha kane ka jingialang ban wan soi ia ka jingai jingkyrshan ka jong ki ia kane ka bill bad ban sngap ruh ia ka jingiakren halor katei ka Bills bala wanrah da ka KHADC ban iada ia ka jaidbynriew rit paid.
Ka nongkren kaba kongsan eh ha kane ka sngi ka dei ka MDC jong ka Mylliem ka kong Telinia Thangkhiew, ha ka jingkren ka jong ka kala ong ba na ki 28 ngut ki MDC kiba don hapoh ka iing dorbar ha ka sngi ba wanrah ia kane ka Bill khlem da don ka jingiakren kila ia mynjur lang da baroh.
Haba pynshai ia ka jingkynnoh jong ka Kong Praticia Mukhin, Angela Rangad, kong Theilin Phanbuh ka Chairperson jong ka Meghalaya State Women Commission, ka Sister Judith bad kiwei haba ki leit ban ai ia ka jingthoh sha u Lat jong ka jylla kila ong ba kane ka Bill ka long ba Bill ban ban bein ia ki riew kynthei ka dei ka jingkynnoh kaba bakla haduh katta katta da kitei ki briew kiba sngewtip ain.
Kane ka Bill kaba la wanrah da ka KHADC ka long ba ia ki kynthei khasi kiba ia shong kurim bad ki bym dei khasi kin duh noh ia ka jinglong rit paid hapoh ka riti synshar jong ka Ri India, kane ka Bill ka khlem khang iano iano ha kaba ia dei bad ka jingiashong kha shongman haba ki la ia ieit. Ka jingkynnoh ba ka dei ka Bill ba ban bein ia ki kynthei ka long kaba bakla shibun.
Ha kane ka jingialang kaba la long mynta ka sngi baroh ki nongkren bad ki paidbah kiba la wan ban sngap ia kane ka jingialang kila pynpaw ia ka jingkyrshan ka jong ki ia ka Bill kaba la pass da ka KHADC ba kan long ka stieh ban ia da ia ka jaidbynriew.
