Shillong, Naiwieng 23: Ka jingrakhe ia Seng kut snem kala kynjoh sha ka 118 snem mynta u snem 2017, kane ka jingrakhe ka long ban kynmaw burom ia ki 11 ki riew rangbah kiba shim ia ka rai ban dei ban pynneh pynsah iala ka jong ka riti ka dustur kum ki khun khasi khara na ka jingshah tyllep ha ki dutur kiba wan na sha bar.
Ka jinghikai kaba ki 11 ngut ki riew rangbah kaba kila ai ka long ba dei ban pynneh pynsah iala ka jong ka Riti ka Dustur, ban kamai ia ka hok, ban ieit ia la ka jong bad burom ia ka jong kiwei. Kane ka jinghikai kala nang heh nangiar bad kala neh haduh kine ki sngi kiba mynta.
Ia kane ka jingleh burom ia kane ka sngi kaba mynta ia kaba la juh rakhe ha kane ka sngi ka 23 tarik Naiwieng ia ka Seng Kut Snem mynta ka sngi la sdang ia ka jingrakhe da ka jinglehniam leh rukom ha Madan Iewryhep shuwa ba kan don ka jingiaid paidbah ha ryngkat ka riam tynrai da u BHa Phor Kharkylliang bad yn poi ha iing seng khasi ha Mawkhar ia ka jinglehniam la pyndep da u rangbah Skor Jala bad ha Madan weiking la pndep da ki reiw rangbah ka seng.
Ha ka jingkren jong ki riew rangbah ha Madan Weiking kila kyntu ia ki para kur para kha ban bat iala ka jong ka riti ka dustur ka niam ka rukom ban neh ban sah ka jaid bynriew khun khasi khara. Ha kane ka sngi da ki hajar ki paidbah na kylleng ka Ri Khasi kila ia poi ban ia sakhi lang ia kane ka sngi sah kynmaw. Ha dien ka jingkren kila don bun ki jingialehkai katkum ki riti ki dustur jong ki dang bad ki jaka jong ka bri u hynniew trep.
