Shillong Jylliew 25: U MLA jong ka mawsynram Constituency u Bah Himalaya Shangpliang hynne ka sngi u la leit ban ia kynduh ia u Minister jong ka Urban Affairs u Bah Hamletson Dohling bad dawa ban pynioh bus saw ha ki saw tylli ki thain kiba don hapoh jong ka Constituency.
Kane ka jingdawa jong u MLA kala hadien ba u la lap ba ka don sha ka jingeh kaba khraw ba ki paidbah ki ia kynduh namar ba ka bai kali sumo ruh ka rem bha bad kane ka ktah ia ki paidbah kiba duna ha ka ioh ka kot.
Na ka liang jong u Bah HM Shangpliang u la dawa na u Minister ba u ai hynriew tylli ki bus saw ha ki saw tylli ki thain kiba don hapoh jong ka Mawsynram Constituency bad kane ka jingdawa kan iarap shibun ia ki paidbah lada na ka liang jong u Minister u lah ban pynioh.
U Bah Shangpliang u la dawa na u Minister ban pynioh ar tylli ki bus saw ha ka thain Bhowal ban buh ha Dangar 2 tylli ki ban mih ban wan sha Shillong lyngba ka Mawsynram ter ter shaduh Shillong bad kumjuh ruh 2 tylli na ka bynta ka thain Ryngku kawei ka bus na ka bynta ka thain Lawbah bad kawei pat kadei na ka bynta ka thain Sawsymper.
Halor kane ka jingdawa jong u MLA ka Mawsynram na ka liang jong u Minister u la pyntip ha u Bah HM Shangpliang ba tang shu wan poi ki bus saw ba thymmai na ka liang jong u un sa pynurlong ia kane ka jingdawa na ka bynta ka jingmyntoi jong ki paidbah.
Kum ban shu pynkynmaw ba ha ka thain Bhowal mynshwa ki don ki bus ba kamai hynrei mynta satang ki kali rit kiba kamai kum ki sumo bad kiwei de ki kali rit bad kane ka long ka jingeh ba khraw na ka bynta ki paidbah kiba kham duna ha ka ioh ka kot.
Lada kane kan urlong kan dei shisha ka jingiarap kaba khraw bha na ka bynta ki paidbah jong ka dong ka thain hi baroh kawei.
