Shillong, Rymphang 03: Ki dkhot jong ka North East Student’s Organisation (NESO) hapoh ka jingialam jong u Bah Samuel Jyrwa mynta kila don hapoh ka nongbah Delhi ban ia kynduh ia ki nongialam seng sain pyrthei kiba dei na kiwei ki jylla jong ka Ri India ban pan ia ka jingkyrshan jong ki ban pyrshah ia ka Citizenship (Amendment) Bill, 2016 lada ka BJP ka wanrah hapoh Rajya Sabha ha kane ka sien shong dorbar kaba mynta.
Haba kren ha u SP News Agency, u Chairman jong ka NESO u Bah Samuel u la iathuh ba mynta ka sngi kum ka kynhun kila ia kynduh ia ki nongialam jong ki seng sain pyrthei ka Biju janata Dal (BJD) ki nongialam jong ka Janata Dal United (JDU) bad mynta ka miet kin ia kynduh ruh ia u nongialam jong ka Shiv Sena u Sunjay Rawat.
La shai ka sngi ruh kin dang iai bteng ban ia kren bad kiwei de ki nongialam seng sain pyrthei na kiwei ki jylla jong ka Ri India ban pan ia ka jingkyrshan jong ki ba kin pyrshah ia kane ka CAB, lada ka BJP kan wan rah hapoh Rajya Sabha ha kane ka sien shong dorbar kaba mynta.
Kum ka kynhun kila ia kynduh ruh ia u myntri rangbah ka jylla u Conrad Sangma ha Nongbah Delhi bad ia kiwei ki nongialam jong kane ka thain shatei lam mih ngi jong ka Ri India. Na ka liang jong ka NESO kan pyrshang katba ka lah ban pan jingiarap na kiwei ki seng sain pyrthei ban pyrshah ia ka CAB.
Wat la ka BJP kam shym buh shuh ia kane ka CAB ha la thup jong ki Bill ban wanrah hapoh Rajya Sabha ha kane ka sien shong dorbar kaba mynta, hynrei katba ka iing dorbar ka dang iaid kaei ka ban jia ha kaba ia dei bad kane ka bill ym pat lah ban batai, kumno na ka liang jong ka NESO kam shym la shong kli kti ban tur ban pan ia ka jingkyrshan jong kiwei ki seng sain pyrthei ba kin pyrshah ia kane ka bill lada wan rah hapoh Rajya Sabha.
