Shillong, Naitung 17: Hadien ka jingiakynduh Ka ban ia kren ia ka jingthmu ban wanrah ia ka jingpynkylla ia ka “Indian Forest Act 1927”, kaba la khot da ka tnad khlaw jon
g ka sorkar jylla, ha Shillong ha ka 16 tarik July 2019, na ka liang ka Meghalaya Land and Forest Owners Association (MLFOA) bad na ka Federation of Khasi States ki la pan por ar bnai.
Kane ka jingpan por ka long ba kin sa ai jingmut sha ka tnad khlaw halor ka Indian Forest Act 1927 kaba la Sorkar India ka thmu ban pynbeit thymmai bad ban pynjari ha baroh kawei ka Ri India, bad kiba bun ki kyndon ha kaba lyngkot ka jingbatai katei ka Ain Khlaw Ka Ri India Kan sa don ka bor ban iada ia ki Khlaw bad kaba kynthup ruh ia ki kyndon ban kem bad ban pynshitom ia kito kiba pynkhien ia ki Ain Khlaw, bad ka don ruh ka kyndon ha kaba la tyrwa ba ki nongpyniaid Shnong ki ophis Shnong ki dei ban ia trei Lang ryngkat bad katei ka Ain Khlaw ha kaban pynjari ia kitei ki kyndon baroh.
Ha katei ka Act la pynsngew ruh ba ka jingthmu ka long ruh ban pyndep ia ki jingkular Jong ka Ri India lyngba ki “International Commitments” kiba ka Ri India ka la soi bad mynjur ha ka UN. Katei ka draft Indian Forest Act ka don haduh 123 sla. Na ka liang ki heh ka tnad khlaw ki la mynjur ban ai por ia baroh ki kynhun kynthup ki riewpaidbah, ki riew shimet, District Council, ban ai ki jingpynsngew Jong ki da ka jingthoh.
Na ka liang ka MLFOA bad ka Dorbar Ki Khlieh Nongsynshar la pynsngew ia ka jingdonkam ia ki bor Sorkar Jylla bad ki District Council kynthup Lang ki trai khyndew trai Khlaw, ki Khlieh Nongsynshar ba ka dei ban long ka Act kaba ithuh ia ki rukom bat khyndew hapoh jylla Meghalaya naduh ki law kyntang, ki law kur, ki law shimet, ki law Shnong bad kiwei kiwei.
Halor kane ka phang ynda la wai katei ka jingialang ki dkhot ka MLFOA bad na ka Federation of Khasi States ki la leit ia kynduh ia u Bah T Dkhar, MDC, Chief Executive Member, KHADC bad la kyrpad ia ki bor KHADC ban shim khia ban peit bniah ia kane ka Act bad kiwei kiwei ki Act Kum ka Forest Conservation Act 1980 kaba la sloit lut ia ki bor KHADC ha ka Kam Khlaw.
La kyrpad ia u CEM, KHADC ban dawa na ka Sorkar Meghalaya ba ka dei ban pyndep ia ka jingkular kaba la shim naduh ka 13 April 2000 ha kaba ka Dorbar Assembly ka la rai ban dawa na ka Sorkar India ban pynlait ia ka jylla Meghalaya na ka Forest Conservation Act 1980 katkum ka para 12A (b) Sixth Schedule Jong ka Constititution of India, namar ki rukom bat khyndew ki pher na kiwei ki jaka ha Ri India.
U CEM KHADC u la mynjur ban bishar bniah kyrkieh ia kane ka draft ban ban khot ka jingialang ha shen ban ia kren halor kane ka mat. Na ka liang u Bah John F Kharshiing Adivser MLFOA & Adviser & Spokesperson, Federation of Khasi States bad u Bah B Pohshna, President, MLFOA bad kiwei kiwei ki dkhot ki la pyntip ha u CEM.
Kane ka jingpyntip ka long ba ka MLFOA ka la rai ban Lum jingialang kyrkieh ha ka 2 tarik August 2019 ha Shillong ban ia kren halor kane ka phang bad la kyntu jur ia ki bor KHADC ban shim khia ban ia kren sani bha bad ka Sorkar Jylla halor kine ki Act Central kiba lah ban pynjngut ia ka jinglong trai halor ka khyndew ka shiap, ki Khlaw ki btap katkum ka Riti dustur.
La pynpaw ba haduh kine ki sngi mynta naduh u snem 1997 haduh kine ki sngi mynta la dap 22 snem naduh ba mih ka hukum Supreme Court la Shem ba ki paidbah Kim banse ban ki ia trei dieng trei kharkana dieng ha ka jinglong be-ain.
Na ka Liang ka Federation of Khasi States ka pynsngew ba ha ka 17 July 2019 Kan dap 184 snem ba iap u Syiem Tirot Sing Syiemlieh, uba ieng ban pynioh ia ka jinglaitluid kumta ka por ka dawa kyrkieh ba ngin iohi ia ki 3 MP, ki 60 MLA ki 90 MDC ki Syiem, Lyngdoh, Sirdar, Wahadar, Dolloi, Myntri, Basan, Nongsynshar Raid, Rangbah Shnong, Sordar Shnong ba kin mih Kum u Tirot Sing ba kin smat ban pule ia ki Ain ki kanun ban ioh ka jingshemphang ban ioh iada ka Ri Khasi Jaintia lyngba ka Instrument of Accession bad Annexed Agreement 17 August 1948, kaba la mynjur bad soi hapdeng ka Sorkar India bad Ki Khasi States.
