Shillong, K.Lyngkot 17: U Myntri kam poh iing ka jylla u bah Lahkmen Rymbui la iathuh ba ka jingialang jong ka Kabinet kala ia kren ia ka mat ha kaba ia dei bad ka rta thung kam bad la buh ba dei ban pynkiew na ka 32 snem sha ka 37 snem kata ka long bab pynjan da san snem, ia kane ka bynta ka Kabinet kala ia thir mynta ka sngi.
Ka jingbym pat lah ban rai ka jingialang jong ka Kabinet kaba la long mynta ka sngi ka dei ba don ki katto katne ki bynta, ha kaba ia dei bad ka rta thung kam ia ki briew ki ban rung kam ha ki kam ba hap ban riam Uniphom, kum ki Pulit, Home Guard, Forest Guard dei halor kane ba la hap ban rah biang sha kawei pat ka jingialang jong ka Kabinet ban shim rai.
Kiwei ki rai kiba la shim ha ka jingialang jong ka cabinet, ki long ba la shim ia ka rai ban ia ki ophis sorkar yn rah noh sha Mawpdang Mawkhanu sha new Shillong bad ia u Mawnongrim ynbuh ha ka 21th Kyllalyngkot 2022 mynta u bnai, kane ka jaka kaba ka sorkar kala dep ban thied ka don haduh 800 akar.
Kawei pat ka rai ka long ba ka sorkar kan pyntrei kam ia ka jingpynpoi ia ka bam ban tei met ki khynnah kiba hapoh ka 6 snem, la shim ia kane ka rai ka long ba ki don haduh 1000 tam ki shnong ha Meghalaya kiba ym don ia ka ICDS, da kaba pyntrei kam ia kane ka skhim kitei ki 1000 tylli ki ki shnong kin ioh ia ka jingmyntoi.
Haba ia dei bad ka jingpynbeit ha kaba ia dei bad ka jingsiew ia ka khajna, ka cabinet ka la shim ia ka rai ban shah ia kito kiba la dep ban buh ia ka aplikoshon hynrei kiba khlem pat ioh siew ia ka khajna, kane ka rai ka long ban ailat ia kito ki nongkhaii ba kin siew ia ka khajna lyngba kane ka sorkar kan ioh T.12 klur.
Haba ia dei bad ki kali kiba wan na kiwei ki jylla, ka cabinet kala pdiang ia ka rai jong ka sorkar pdeng ba ki briew haba ki leit na kawei ka jaka sha kawei ka jylla kim don kam shuh ban register ia ki kali jong ki hynrei kin ioh ia ku juh u nymber.
