Shillong, Risaw 27: Na ka bynta ban pynlait ia ka skhim ‘Special Rural Work Programme’ (SRWP) ia kaba la ia tip paidbah kum ka MLA skhim, ban pynlait ia ka kane ka skhim kaba dei ka ‘state Scheme’ ka long ha dien ba ka ‘State Level Committee’ kan shong bad shim ia ka rai ha kaba u myntri rangbah ka jylla u long u Chairman jong kane ka Committee.
Ka jingmang pisa na ka bynta ki 60 ngut ki MLA ha ka jylla na kane ka skhim SRWP ba kin pyntrei kam ha ki constituency kaba ki mih khmat na ka bynta jong u snem 2017-2017 ka long ar klur tyngka bad kum juh na ka bynta jong u snem mang tyngka 2017-2018 ruh ka long ar klur tyngka. Kane ka skhim ka wan lyngba jong ka tnad pynroi nongkyndong.
Ka Director jong ka tnad pynroi nongkyndong ka I R Sangma haba kren ha u snem SP News Agency ka iathuh ba kane ka State Level Committee ka juh shong ha pdeng u bnai Risaw bad Nohprah bad u myntri rangbah ka jylla u long u Chairman bad ki dkhot ki long ki myntri bad ki khlieh jong ki tnad sorkar.
Haba ia dei bad ka jingmang pisa na kane ka skhim ka ia pher na u wei u snem mang tyngka sha u wei pat u snem ka shong ha ka jingdon pisa ka sorkar, dei tang ha u snem mang tyngka 2016-2017 la pynkiew sha ka ar klur tyngka, katba ia mynta u snem 2017-2018 pat ym pat lah ban ong ka shong ha ka State Level Committee ban shim ia ka rai la yn pynkiew ne pynhiar.
Haba ia dei bad kane ka skhim, ha ka snem ba la dep kala don ka jingbuh kyndon ba ki MLA ki lah ban pyndon kam ia kane ka skhim tang haduh 60% na ka bynta ban thied tiar bad 40% ki dei ban pyndon kam lait noh na ka thied tiar. Hynrei na ka bynta mynta u snem ym pat lah ban ong namar ka shong ha ka State Level Committee ba kan rai.
