Pdiang ka cabinet ban pyndep ia ka Ganol HP Project ha ka jinglut kaba T.507.71 klur

Shillong, Nailur 07: Ka jingialang jong ka kabinet kaba la long mynta ka sngi kala pdiang ia ka jingpynkiew dor ban pyndep ia ka Ganol Hydel Power Project ha West Garo Hills sha ka T.507.71 klur tyngka bad ia kane ka jaka pynmihbor ding kaba 22.5 MW yn pyndep ha u snem 2022.

Haba kren ha ki lat pathai khubor u James K Sangma myntri ba dei peit ia ka tnad bording jong ka sorkar jylla u la iathuh ba la pdiang ia kane ka jaka pynmih bording eletrik ha u snem 2008 bad ha u snem 20013 la pynkiew ia ka jingtei ia kane ka jaka pynmih bor ding sha ka T.332.68 klur.

Hynrei ynda la sdang ban pyntrei ha u snem 2014, la shem ba don ki jingpynkylla ha kaba sdang ia ka jingtrei kumta la hap ban pynkiew biang ia ka dor jong kane ka jingtrei sha ka T.356.43 klur kane ka long katkum ka dor jong u snem 2014.

Katba dang iaid ki por ki dor jong ki mar ki matta kila kiew bad mynta la shim ban pynkiew ia ka dor jong kane ka jingtrei kaba dei jong u snem 2019 bad ha kane ka jingpynkiew dor ia kane ka jingtrei la rai ban pynkiew sha ka T.507.71 klur bad ia kane yn pyndep ha u snem 2022.

Haba ia dei bad kane ka jingpynkiew dor ia kane ka jingtrei ban pyndep ia kane ka jaka pynmih bording ha Garo Hills, la shah ia ka MePDCL ba kan shim ram na ka sorkar jylla T.51 klur ia kaba la tip kum ka State development Loan bad ia ka T.173.11 klur la shah ba kan shim ram na ki kynhun bei pisa.

Haba ia dei bad kane ka sorkar jylla bad ka MePDCL kin hap ban ia soi ia ka soskular ba kan don ka High Power Committee ban peit ba ka MeECL kan siew thikna ia ka ram kaba la shah ban shim mynshuwa kaba la kot sha ka T.1345 klur kaba la ai jingbit ka sorkar.

What Next?

Recent Articles

Leave a Reply

Submit Comment

*