Shillong, Naiwieng 27: U myntri rangbah ka jylla u Cornad K Sangma, mynta ka sngi u la wan rah biang ia ka rai jong ka sorkar ban dawa na ka sorkar pdeng ba dei ban pynrung noh ia ka ktien khasi bad Garo hapoh jong ka Eight Schedule jong ka Constitution jong ka Ri India ia kaba la pdiang da ka iing dorbar baroh kawei.
Ha ka jingkren jong u myntri rangbah ka jylla haba wanrah biang ia kane ka rai, u la ong ba ha dien ba ka iing dorbar kala dep pdiang ia ka rai ha ka 27/10/2018 ia kane ka rai, na ka liang jong ka sorkar kala ia kren bad ki dkhot jong ka Khasi Author Society (KAS) ka A’chick Literary Society (ALS).
Ha dien ka jingiamir jingmut kaba bniah la don kam kam ban wanrah ia ka Rai kaba kham khlain ban phah sha ka sorkar pdeng ba ka dei ban pynrung noh ia ka ktien khasi bad Garo hapoh ka Eight Schedule jong ka Constitution jong ka Ri India.
Halor ka jignong ba don kam ban leh la ka jong ka jong ka Rai ia ka ktien khasi bad Garo na ka liang jong u myntri rangbah u la ong ba kam da long kaba don kam, namar ka sorkar pdeng kan sa shim ia ka rai. La kular ba ka sorkar jylla kan sa shim khia ban bud dien ia kane ka kam banpeit ba kan long kam.
Ka Dr Ampareen Lyngdoh ha ka jingkren ka jong ka kala ong ba ka ktien ka dei ka bor jong kano kano ka jaidbynriew dei na kane ka daw ba ka iing dorbar baroh kawei ka pdiang ia kane ka rai khlem da ia thew ia who.
Ha ka jingkren u Bah SK Sun, u la ong ba ka sorkar ka dei ban ithuh noh ia ka KAS bad ia ka ALS ba kin bud dien ia kane ka kam ha kaba ia dei bad ka sorkar pdeng ba ka sorkar jylla ka dei ban bei na ka bynta kane namar don kam ia ki kynhun kiba khlain ban bud dien.
Ha ka jingkren jong u dr Mukul Sangma nongialam ka liang pyrshah hapoh ka iing dorbar u la ong ba, ka sorkar ka dei ban buh kyrpang ia ki ophisar ban peit ia kane kam khnang ba kane ka jingpdiang ia ka ing dorbar ia kane ka rai kan nym long lehnoh ei. Kane ka jingwanrah biang ia ka rai sha iing dorbar ka pyniba kim don ki ophisar ba peit tang ia kane ka kam.
U Bah Adelbert Nongrum, ha ka jingkren jong u la ong ba kane ka jingkwah ban pynrung ia ka ktien khasi bad Garo hapoh ka eight schedule kam dei ka jingkwah, hynrei ka dei ka jingdon kam ia kaba la iakhih naduh u snem ba ioh ia la ka jong ka jylla la jong. Dei ha u snem 2005 ba la pynlong ktien symbut sorkar ia ka ktien Garo bad Khasi.
