Shillong, Kyllalyngkot 11: U Myntri Rangbah ka jylla u Conrad K Sangma mynta ka sngi u la pyntip ba ha ka jingialang jong ka kabinet kila pdiang ia ka “Meghalaya Tourism Policy 2023 ban bujli ia ka polisi kaba la don naduh u snem 2011.
Ka jingwanrah ia kane ka polisi kaba thymmai ka long ban plie lat ia ki riew shimet ba kin ia shim bynta kham bha ban kyntiew ia ki kam jngohkai pyrthei bad kane kan long ka lat ai kam ai jam ia ki samla.
Ha ka juh ka por lyngba kane ka policy kaba thymmai ka long ban pynlong ia ka kam jngohkia pyrthei kaba neh bad ka ban iai sah, ka kam jngohkai pyrthei kan long kawei na ki lat ban kyntiew ia ka kamai ka jih jong ki paidbah.
Kawei pat ka rai kaba ka kabinet kala shim mynta ka sngi ka long ba la pdiang ia ka Meghalaya State Organic and Farming Policy 2023, kane ka long ban ban pyniaid ryntih ia ka rep ka riang ban ai ia ka syrnot na kane ka jylla haba ia dei bad ki marrep.
U myntri rangbah ka jylla la ong ba ia ka syrnot ha kaba ia dei bad ki marrep ban shallan sha bar jong ka Ri India yn ai noh da ka Bio Resources Development Committee, kane kan ai ia ka syrnot .
Ban pynlait ia ka jylla na ka jingdih drok ka kabinet kala pdiang ia ka Drugs Reduction Elimination and Action Mission, ka jingthmu jong kane ka long ban ia treilang ban ia khun pyrshah ia kane ka kam dih drok ha kane ka jylla.
U Myntri ba dei peit ia ka tnad pathai khubor u James K Sangma u la iathuh ba ka kabinet mynta ka sngi kala pdiang ia ka Media Policy bad kane ka long ban wanrah ia ka jingpynrytih ha kine ki kam pathai khubor khamtam ha kaba ia dei bad ki jingpynbna sorkar.
