Shillong, Naiwieng 25: Ki ar tylli ki seng nonghikai ka KJDSTA bad GHDSTA kila pdiang ia ka rai jong ka Meghalaya Board of School Education (MBOSE) ha kaba ia dei bad ka jingkylliang noh ia ki kot pule jong ki khynnah na duh Class I haduh Class X.
U Bah ED Nongsiang president jong ka KJDSTA bad ka jingdon lang na ka GHDSTA haba kren ha ki nongthoh khubor mynta ka sngi ha dien ka jingiakynduh lang ka jong ki kila ong ba ha dien ka jingiamir jingmut bad ia kren ha ka jingiadon lang kito ki dkhot kiba don hapoh jong ka Kommittee ban peit bniah ia kane ka kam kine ki ar tylli ki seng kila pdiang ia kane ka jingleh jong ka MBOSE.
U Bah Nongsiang u la ong ba ka MBOSE kam shym la leh kyrkieh ia kane ka kam, kala thung ia ka kommitte peit bniah ha kaba ki nonghikai kiba hikai ia ki subject kila don lang bad kane kala sdang naduh u bnai Lber mynta u snem bad kane ka kommittee kala ia shong bun sien ban pynwan dur ia ki kot ba kin long ia ryngkat bad ki kot jong ka CBSE bad ICSC bad kine yn sa sdang ban die naduh une u snem ba thymmai.
Na baroh ki kot kiba la bishar bniah da ka Kommittee ki long kiba bit ba biang bad kaba la pynneh dei tang ia ka kot Health Education, kaba dang pynneh da ka juh namar ka kham bha ha kane kaba bynta ban ia kine ki kot kiba thymmai. Na ka bynta ki Class XI bad Class XII pat ka MBOSE kan sa leh ha u snem ban wan.Haba ia dei bad ka jingbym don ki kot khasi ha iew kin sa ia kren ia kane bad ka MBOSE.
Haba ia dei bad ka dor na ka liang jong kine ki ar tylli ki seng jong ki nonghikai kila dep ban ia kynduh ia ki briew jong ka MBOSE ba ka dei ban ong ia ki nongshong ia ki kot ba ka dei ban long kaba biang khnang ba kan nym ktah ia ka kmie ki kpa ha kaba ia dei bad ka dor. Ia kane ka phang kila dep ban ia kren bad ka MBOSE bad ka MBOSE ruh kala mynjur ban peit bniah ia ka dor.
