Shillong, Lber 28: Ka seng lyngba ka Education Cell naduh ka snem 2016 ka la phah da ka open letter sha u myntri rangbah ka jylla ha kato ka por ban ai jingmut ia ka tnad pule puthi ban shim noh da ka syllabus dong ka NCERT khnang ban kham pynjanai shuh shuh ia ka pule puthi ha ka jylla Meghalaya.
Ka seng hadien ba ka la iohi ia kane ka rai jong ka sorkar jylla ka ba mynta ban pdiang noh da ka curriculum jong ka NCERT ka pynpaw ia ka jingsngewkmen ba shikatdei halor kane ka rai ba iohi jngai jong kane ka sorkar kaba mynta. Ka seng ka ai khublei ruh ia u education minister uba la shim khia ban wanrah ia kane ka jingkylla kaba donkam shikatdei ban kyntiew ia ka pule puthi ha kane ka jylla jong ngi.
Ka seng ka sngewthuh ba lyngba kane ka sienjam jong ka tnad pule puthi ka sorkar kan iarap shibun eh ia ki samla pule ka jylla khamtam kito kiba thrang bad angnud ban iakhun ia ki competitive exams bapher bapher. Kumba la iohi ba ha kane ka juk ba mynta ba kiba bun ki entrance examinations ha kaba iadei bad ki jingpule lain ki ju sot na ka syllabus jong ka NCERT ban pynlong ia kum kine ki jait exam kum ka AIEEEW/JEE, AIMPT/NEET, CAT, CSE bad kumta ter ter.
Katkum ki lad pathai khubor ba mynne ka sngi kata ka 28.03.2018 ha kaba ka sorkar jylla lyngba u Education Minister, u bah Lahkmen Rymbui ka la pynbna ba naduh ka samoi 2018-2019 ka MBOSE kan pyndonkam noh da ka curriculum jong ka NCERT kaba dei ruh ka syllabus jong ka CBSE na ka bynta ka klas XI bad XII.
Shuh shuh kane ka jingpynkylla ha ka liang ka syllabus da ka sorkar jylla kan pyniahap kyrdan ia ka pule ka puthi jong ka jylla bad kiwei kiwei ki jylla ha ka ri India. Ka seng ka ngeit skhem ba ka tnad Education Department hapoh ka jingialam u bah Lahkmen Rymbui kan sa wanrah shuh shuh shibun kiwei pat ki jyngkylla ha kaba iadei bad ka pule puthi ha ka jylla khnang ban pynkiew kyrdan shuh shuh ia ka rukom pule puthi ha jylla Meghalaya.
Khatduh khatwai ka seng ka shim ruh ia kane ka kabu lyngba kane ka kyrwoh ban ai khublei kyrpang ia ka samla Monjurlang L. Suchiang kaba la ioh ia ar tylli ki takma ksiar na ka University of Mysore ha kaba ka la wan ba nyngkong ha ka eksamin Master of Law (LLM). Ka seng ka kitbok kitrwiang ia kane ka samla ba kan dang iai kiew irat ha ka jingangnud ka jong ka bad ka ngeit ba kan dang iai wanrah burom shuh shuh ia ka Ri bad ka Jaidbynriew.
