Shillong, Jylliew 16: Ki nongtrei jong ka Mawmluh Cherra Cement Limited hapoh jong ka lama Mawmluh Cherra Cement Employees Union kila wengnoh ia ka jingiakhih kaba la neh lai sngi lynter kaba kila pynlong ha ophis jong ka Kompeni ha Lachumier ha ba kila ia kynduh ia u shongknor ka MCCL u bah Wailad Shylla.
U President ka seng u bah Shanlang Diengdoh President haba kren ha khmat ki nongtrei kiba la wan ban ia khih ha Shillong, la ong ba u shongknor ka MCCL u la thoh sha ka sorkar ba kan mang pisa ar klur tyngka man ka lai bnai ban siew ia ka tulop bad ia kane la phah sha u myntri rangbah ka jylla.
Haba ia dei bad kito ki nongtrei kiba kwah ban shongthait noh khlem pat dei por u shongknor ka MCCL u la bthah ia ki nongialam ka MCCEU ban pyntip sha ki nongtrei ka MCCL ba lada ki don kiba kwah kin phah ia ka kyrteng sha ka ophis jong ka MCCL ba kin dup tip kumno ban shim ia ki lat ki lynti.
Haba ia dei bad ka karkhana ka MCCEU ka kren shai bad ki sait kti ruh ba kin nym don ei ei ban ong pyrshah ne kyrshan namar kane ka dei ka kam jong ka sorkar bad ki trai jaka, kaei kaba ki don ban ong ba lada ka sorkar ka aiti sha ki riew shimet ne ka pyniaid hi kam dei ban ktah ia ki nongtrei kane ka jingkwah ka MCCEU.
Ha kane ka jingialang shuwa ban weng ia ka jingiakhih u bah Diengdoh u la ong ba kum ka kynhun kim don bynta bad kano kano ka seng sain pyrthei, ka jingialeh ka jong ki ka long beit ban iada ia ki nongtrei ka MCCL bad kumno ban iohi ba kane ka karkhana kan iaid kumba ka long.
Ia ka jingthoh kaba la phah na u shongkor ka MCCL la pule da u Secretary ka MCCEU u bah Pynskhem Lyngdoh ha kaba ki nongtrei ka MCCL kila pdiang ia kata ka jngpan por ka sorkar shitaiew ban pynbiang ia ka jingkuklar da kaba ia rah kti.
