Shillong, Risaw 27: Ka party National People’s Party (NPP) mynta ka sngi kala pdiang sngewbha ia u bah HS Shylla MDC jong ka Nongkrem kum u dkhot ba pura jong ka party ia kane jingpdiang burom la leh da u Bah Bet Sangma Secretary jong ka party.
Ha kane ka sngi nalor u bah Shylla ka don kumba 45 ngut kiba la rung sha ka NPP kiba dei na ka Nongkren Constituency, Da kane ka jingrung NPP kala pynthikna ba u Bah Shylla un long u kyrtong MLA jong ka party NPP na ka Nongkrem Constituency.
Haba kren ha ki lad pathai khubor ha dien ka jingrung jong u sha ka NPP u Bah Shylla u la ong ba ka jingiathuhd bad ka PDF ka long mynta la kham katto katne bnai bad ka daw kaba kongsan ka long ba u bah PN Syiem kum u CEM ym shym la shimkhia ia ka MDC skhim jong ki 6 ngut ki MDC kiba jop ia ka Election shiteng samoi.
La ong ha ba ki nongkyrshan jong u kila peit bha ia ka jinglong jingman jong sain pyrthei ha ka jylla ki paidbah ki kwah ba ha u snem 2018 ka dei ban don ka sorkar ka bym dei na ka seng Congress bad kaba lah ban pynliem ia ka seng Congress dei tang ka NPP bad mynta kane ka jingkwah jong ki paidbah kala sawa jam hapoh ki lum Khasi.
Haba phai sha ka HSPDP, ka PDF bad ka UDP kine ki party kin nym lah ban poi sha ka thong ban thaw sorkar namar ki don ia ka jylli jong ki tang hapoh Khasi Hills ym wat tang ha Jantia Hills ruh, ha Jaintia Hills ki don tang hangne hangtai bad sha Garo Hills kim don jaka.
Kaba lah ban wan ha ka sorkar dei tang ka seng NPP, ki paidbah ki seng khiaw bha ha man ka por ba ki leit ban ia kynduh ia u MLA, ka juabab ka long bay m lah ban leh ei ei namar bay m don ha ka bor, dei kane ka jingong jong u MLA kaba la pynlong mynta ia ki paidbah ba ki kwah ia u nongmih khmat jong ki u ba don ha ka bor ka jingrung NPP mynta ka long ba ka NPP kan wan ha ka bor.
Haba phai sha ka EC jong u Bah PN Syiem hapoh KHADC u Bah Shylla u la ong ba kane kan nym ktah ia ka EC bad mynta ki don saw ngut ki MDC kiban rung sha ka NPP bad ha dien ba kila rung kin sa thaw ia ka PP jong ka NCP hapoh jong ka KHADC bad ka shong ha ka Party ba kan rai.
Ka jingieh noh ka jong u ia ka PDF ka long ba ka riti trei kam jong ka party People Democratic Front (PDF) ka dei kaba la shu shim kylliang na Assam, bad kawei ka long ba kam pat shai haduh mynta. Haka juh ka por ka PDF ka la ai tiket ia u Bah Hilarius Pohshen ia kata u bah Shylla u la ong ba um don jingsngew ei ei.
