Peit bniah u Myntri Rangbah Duh ia ka rukom shna ia ki dawai ha 3 tylli ki jaka

New Delhi, Naiwieng 28: U Myntri Rangbah Duh ka ri, u Narendra Modi mynta ka sngi u la leit sha lai tylli ki nongbah ban peit bniah ia ki kam ba iadei bad ka jingpynmih ia ki dawai ha kine ki jaka. U la leit sha Zydus Biotech Park ha Ahmedabad, Bharat Biotech ha Hyderabad bad Serum Institute of India ha Pune.

Ki stad science ki la pynsngew ia ka jingsngewkmen ba u Myntri Rangbah Duh u la iakynduh markhmat bad ki khnang ban pynshlur ia ki bad ban pynstet ia ki kam jong ki ha kane ka por kaba kongsan ha ka jingpynmih dawai. U Myntri Rangbah u la ong ba u sngew sarong ba ki kam pynmih dawai jong ka India ki la kiew shaphrang haduh mynta. U la ong ruh ba ka India ka bud ia ki jingnang jingstad science ha kane ka jingialeh ban shna ia ki dawai katba ka pan jingmut ruh halor ki lad ban kyntiew ia ki rukom ban sam ia kine ki dawai.

U Myntri Rangbah Duh u la ong ba ka India ka sngew ba ka jingpynbiang ia ki dawai ka long kaba kongsan ha ka jingpynthikna ba ki briew ki long kiba koit ba khiah bad ruh ba ka dei ka kamram jong ka ri ban iarap ia kiwei kiwei ki ri kiba kynthup ia ki ri kiba marjan bad ngi, ha kane ka jingialeh pyrshah ia kane ka khlam.

U la kyntu ruh ia ki stad science ba kin pynpaw shai ia ki jingsngew jong ki kumno ka ri kan lah ban pynbiang shuh shuh ia ki kam ba iadei bad ka jingpyrkhing kiba iadei bad kine ki kam. Ki stad science ki la batai kumno ki trei ha ka kam ban lap ia ki dawai thymmai bad ki jingpynkylla ia ki dawai ban ialeh pyrshah ka khlam COVID-19.

Ha ka jingleit jong u sha Zydus Biotech Park ha Ahmedabad, u Myntri Rangbah Duh u la ong, “Nga la leit sha Zydus Biotech Park ha Ahmedabad ban tip kham bniah shaphang ki dawai DNA jong ka India kiba shna da ka Zydus Cadila. Nga iaroh ia kane ka kynhun kaba trei ia kane ka kam. Ka Sorkar India ka dang iatrei lang bad ki bad kyrshan ia ki ha kane ka kam jong ki.”

Hadien ba u la leit sha Bharat Biotech ha Hyderabad, u Myntri Rangbah Duh u la ong, “ Ha ka Bharat Biotech ha Hyderabad, nga la ioh jingtip shaphang ka dawai COVID-19 ba la shna hi hapoh ri. Nga la iaroh ia ki stad science halor ki jingjam shakhmat ha ki jingpyrshang (trial) haduh mynta. Kane ka kynhun ka dang iatrei lang bad ka ICMR ban pynstet ia ki kam.”

Hadien ba u la leit sha Serum Institute, u Myntri Rangbah Duh u la tweet, “Nga la don ka jingiakren kaba biang bha bad ka kynhun ha ka Serum Institute of India. Ki la ai jingtip shaphang ki jingiaid shaphrang jong ki haduh mynta bad kumno ki la pynkhreh ban kyntiew ia ka jingshna dawai. Nga la leit jngoh ruh ia ka jaka shna dawai ha kane ka jaka.”

What Next?

Recent Articles

Leave a Reply

Submit Comment

*