Shillong, Naiwieng 13: Na ka Liang Jong ka CoMSO ka pynpaw ba ki dap da ka jingsngewsih ban ioh sngew na u Chief Minister ka Jylla u Conrad Sangma ba ka Sorkar India kam pat dep pule ia ka ILP Resolution Jong ka iing Dorbar Thawain ka Jylla kaba don tang 2 page mynta la jan dap shisnem. Kawei ka khristmas ka la leit bad sa kawei kan wan ka Sorkar India Kam pat don por ban pyrkhat ia ka jingthrang ki paidbah ka Jylla ban ioh ka Ain iada Ri ka ILP.
Kane ka jingleh Meinah ka Sorkar India ia ka Jylla bad ka jinglong diengshaindoh ka sorkar Jylla kaba Shu sngap katba kren ki heh BJP na Delhi ka long kaei kaei ka bym lah shuh ban pdiang. Ka COMSO kila iaishah bad khmih lynti ba ka sorkar Jylla kan iaisaid ban pynioh ka ILP ha ngi hangtei ha Delhi hynrei imat mynta ki don Kam biang ban mih madan ha surok ban dawa ILP.
Ha ka juh ka por ka COMSO kam lah ban pdiang ia kata ka jingleh u Governor ka Jylla uba ha ka jingshisha u dei ban sngap ia ka rai ki MLA ha Assembly ba u pynphai noh ia ka MRSSA amendment bill 2020 sha ka Jylla ha ryngkat ka jingkynthoh Jong u.
Na kaliang jong ka COMSO ka buh ka jingkylli hato ka sorkar Jylla kam don briew ban peit ia ki Ain tyrwa ( bill) ba kin shah hikai skul pynban ha uta u Governor , na ka liang ka COMSO ka dawa mardor ia ka sorkar ba Kan phah biang ia ka MRSSA amendment bill Sha u Lat ( lyngba ka ordinance lane Da kaba Khot ia ka Special Session) ba un shu soi noh khlem pynslem shuh.
Na ka liang ka CoMSO ki phah ka khubor bashai sha u heh duh ka BJP ba ha Meghalaya ba ka CoMSO Kan nym ai lad da lei lei ruh em ba yn pyntreikam ia ka CAA. Na ka Liang ka CoMSO la shem taiew kin shong jingialang ban ia pyrkhat noh da ki lad Jingiakhih paidbah pyrshah ia ka jingkuman ka sorkar India halor ka ILP , ban pyrshah ia ka Jing pynphai noh u Lat ia ka MRSSA Amendment Bill 2020.
Ka COMSO kan pyrshah ia ka jingpyntreikam ia ka CAA bad kin pyntikna ba ym don uwei ruh u Khar Bangladesh uba la rung beain ba un ioh long nong India lyngba ba ka Citizens Amendment aAct ( CAA) ha Meghalaya. Kane ka long katkum ka kyrwoh bala phah da u bah Robertjune Kharjahrin, Chairman, CoMSO bad u bah Roykupar Synrem Secretary, CoMSO.
