Shillong, Naiwieng 23: Ka Khasi Students’ Union (KSU) kala phah ia ka dorkhas sha u Myntri Rangbah duh jong ka Ri Ind
ia u Narendra Modi ba dawa na ka sorkar pdeng ban pyntrei kam ia ka inner Line Permit ha kane ka jylla Meghalaya bad banpynlait ia ka jylla Meghalaya na ka Indo-Nepal Friendship Treaty.
Ha ka dorkhas kaba ka seng kala phah ka kdew ia ki katto katne ki mat kiba la sahteng ha ka jylla Meghalaya kum ka jingpyndam noh ia ka CAA, ka jingdawa ia ka ILP, ka jingpynlait ia ka Meghalaya na ka Indo-Nepal Friendship Treaty, ka jingpynbeit ia u pud u sam bad ka Assam, ka jingpynrung ia ka ktien Khasi ha ka Khyrnit kaba phra jong ka riti synshar jong ka Ri India.
Ha kane ka dorkhas na ka liang jong ka KSU kala kdew ruh ha kaba ia dei bad ka Central Agricultural University ha Meghalaya kumba la kular mynshwa. Ka seng ka kwah ban kyntu ia ka sorkar pdeng ba kan shah shkor lem ia ki jingud jingnam ki trai ri trai mulik ka jylla namar la don da ki phew snem ha kaba kiba bun na kine ki mat ki la sahteng. katkum ka kyrwoh kaba la phah da u samla Donal V Thabah general secretary ka seng.
